Монгол Улсын онцлогт нийцсэн хуримтлалын нэгдсэн сангийн тогтолцоог бий болгоход зөвлөх үйлчилгээ үзүүлэх Бүгд Найрамдах Сингапур Улсын Хамтын Ажиллагааны Байгууллагын Зүүн өмнөд Азийн газрын захирал ноён Тан По Текээр ахлуулсан Сингапурын Хуримтлалын нэгдсэн сан (CPF), Сингапурын хамтын ажиллагааны байгууллага (SCE)-ын төлөөлөгчид Монгол Улс дахь айлчлалын үеэр 2022.08.12-ны өдөр (өнөөдөр) Нийгмийн даатгалын ерөнхий газар, Чингэлтэй дүүргийн Нийгмийн даатгалын хэлтэст ажиллалаа.

 

Уулзалтад Хөдөлмөр, нийгмийн хамгааллын яам, Нийгмийн даатгалын ерөнхий газрын холбогдох албаны төлөөлж оролцож, Нийгмийн даатгалын ерөнхий газрын Бодлогын хэрэгжилт, судалгааны газрын дарга Ц.Ганцэцэг Монгол Улсын Нийгмийн даатгалын тогтолцооны талаар мэдээлэл өгөн, төлөөлөгчдийн сонирхсон асуултад хариулж, харилцан санал солилцлоо. Төлөөлөгчид Монголын нийгмийн даатгалын мэдээллийн сангийн бүрдүүлэлт, нийгмийн даатгалын хөгжлийн явц, ялангуяа тэтгэврийн даатгалын санд тулгарч байгаа сорилтын талаар тодруулж, Сингапурын Хуримтлалын нэгдсэн сангийн хөгжлийн туршлагаас хуваалцав.

 

Сингапурын Хамтын Ажиллагааны Байгууллагын Зүүн өмнөд Азийн газрын захирал Тан По Тек “Бид зөвхөн Сингапурын хуримтлалын сангийн ололт амжилт, туршлагаас хуваалцахаар ирээгүй, Монголын нийгмийн хамгааллын тогтолцооны туршлагаас суралцах, мөн ирсэн хугацаандаа олон талуудаас мэдээлэл цуглуулж, үнэлэлт, дүгнэлт өгөхийг зорьж байна” гэдгийг тодотгосон бол Сингапурын Хуримтлалын нэгдсэн сангийн ТУЗ-ын гишүүн Юү Ёон Кан Дон “Монголын хүн амын наслалт нэмэгдэхтэй холбоотойгоор тэтгэврийн даатгал нь хагас хуримтлал, цаашлаад бүрэн хуримтлалын тогтолцоонд аажмаар шилжих, ингэхдээ салбар хоорондын хамтын ажиллагаанд тулгуурлах бодлого баримтлах”-ыг онцолж байлаа.

 

Сингапурын Хуримтлалын нэгдсэн сангийн талаар товч дурдвал, Хуримтлалын нэгдсэн сангийн тогтолцоо нь анх 1955 онд үүсэж, иргэн бүрийн хариуцлага, хүчин чармайлт болон төрийн идэвхтэй дэмжлэгээр хөгжсөнөөр өнөөдөр Сингапурын нийгмийн хамгааллын тогтолцоонд томоохон байр суурь эзлэх болсон. Сингапур иргэн бүр Хуримтлалын нэгдсэн сандаа албан журмаар хамрагддаг бөгөөд иргэдийн төлсөн шимтгэл нь (1) Энгийн данс; (2) Тусгай данс; (3) Эрүүл мэндийн дансанд тухайн иргэний насанд харгалзан ялгаатай хувь хэмжээгээр хуваарилагдан, данс бүрт хүү бодогдож, хөрөнгө оруулалтын өгөөж хуримтлагддаг байна.

 

Иргэн өөрийн данснууд байрших хуримтлалаа хэрэгцээ шаардлагадаа тулгуурлан зарцуулах эрхтэй. Тухайлбал, Энгийн данснаасаа орон сууц худалдан авах, боловсрол эзэмших, Эрүүл мэндийн данснаасаа эрүүл мэндийн даатгалын шимтгэлээ төлөх, эмнэлэгт хэвтэн эмчлүүлэх зэрэг олон төрлийг зардлыг санхүүжүүлэх боломжтой. Харин 55 насанд хүрсэн хүн бүрт “Тэтгэврийн данс” нээх бөгөөд Энгийн болон Тусгай дансны орлогыг тус санд шилжүүлж тэтгэвэрт гарахад нь насан туршид нь сар бүр тогтсон хэмжээгээр олгодог. Өөрөөр хэлбэл, Сингапурын Хуримтлалын нэгдсэн сан нь иргэд хуримтлалын санд шимтгэлээ төлж, орон сууц өмчлөх, эрүүл мэндийн үйлчилгээг санхүүжүүлж найдвартай, баталгаатай тэтгэвэр авах нөхцөлийг бүрдүүлжээ.