Аймгийн Засаг даргын зөвлөл хуралдаж таван асуудлыг хэлэлцлээ. Хурлаар аймгийн хэмжээнд 2024 онд ой хээрийн түймрээс урьдчилан сэргийлэх, хамгаалах талаар хийсэн ажлын тайлан. 2025 онд хийх ажлын төлөвлөгөө, Цэргийн дүйцүүлэх албаны тооны дээд хязгаарыг тогтоох тухай, Болзошгүй аваарын зардлаар хийх ажил,  Аймгийн Засаг даргын нөөц сангийн зарцуулалт, Аймгийн 2025 оны төсвийн төслийн тухай урьдчилсан танилцуулга зэрэг асуудлыг хэлэлцэв.  

Хотын захирагчийн албанаас “Болзошгүй аваар”-ын зардлаар хийх 12 ажлын талаарх мэдээллийг танилцуулж, шаардлагатай санхүүжилтийг шийдвэрлэлээ. Мөн холбогдох албаны мэргэжилтнүүд  оролцож  өнөөгийн нөхцөл  байдлын талаар мэдээлэл өгөв. 

“Эрдэнэт Булганы  ЦТС” ТӨХК-ийн харьяа  Эрдэнэ, Цагаанчулуут багийн хэрэглэгчдийн цахилгаан эрчим хүчний ачаалал ихсэж, одоо байгаа 160 кВА дэд станцууд аваарын горимд шилжжээ.  Иймд Эрдэнэ багийн АТП-24, Цагаанчулуут багийн АТП-419 дэд станцын хүчин чадлыг 250 кВт-аар нэмэгдүүлэхэд    шаардлагатай 36 сая төгрөгийн санхүүжилтыг Болзошгүй аваарын зардлаас шийдвэрлэлээ.  Дэд станцуудын хүчин чадлыг нэмэгдүүлснээр тус хоёр багийн 300 айл өрхийн эрчим хүч сайжрах юм. 

Мөн Зэст багийн 21 дүгээр цэцэрлэгийн Угаалгын байрны гадна цахилгааны шугамд гарсан гэмтлийг засварлаж, газар доогуур кабель татах ажилд шаардлагатай 8 сая 271 мянга,  Говил багийн “Эрх бүжинхэн” цэцэрлэгийн гадна цэвэр усны шугамд гарсан гэмтлийг засварлах ажилд шаардлагатай  10 сая 936 мянган төгрөгийн санхүүжилтийг шийдвэрлэв. 

Түүнчлэн дараахь ажлуудын санхүүжилтыг "Болзошгүй аваар"-ын зардлаас шийдвэрлэлээ. 

• Дэнж багийн 7 дугаар сургуулийн спорт заалны гадна дулаан, цэвэр усны шугамыг засварлах ажилд-16 сая 936 мянга, 
• Нийтийн номын сангийн халаалтын системд доголдол үүссэн тул нэмэлтээр насос суурилуулах ажилд-3 сая 759 мянга, 
• Баянцагаан багийн “Эрдэнэт Ус” ДТС ОНӨХК-ийн Цагаан байруудын 1 дүгээр эгнээний цэвэр усны шугамыг шинээр татаж, ил яваа дулааны шугамтай хамт явуулж дулаалах ажилд-12 сая 367 мянга, 
•  Наран багийн 6 дугаар цэцэрлэгийг хэрэгцээний халуун усны шугамд холбох ажилд-30 сая 863 мянга, 
• Эрдэнэ багийн 11 дүгээр цэцэрлэгийг хэрэгцээний халуун усны шугамд холбох ажилд-26 сая 139 мянга, 
•  Хотын төвийн болон орон нутгийн чанартай авто замыг хүйтэн асфальтаар нөхөхөд  шаардлагатай 27 сая 800 мянган төгрөгийн санхүүжилтийг тус тус шийдвэрлэлээ.