Өнөөдөр  “Эрдэнэт хотын болон  Анхдагч илгээлтийн эзэд”-ийн түүхэн өдөр тохиож байна.  Аймгийн Засаг дарга бөгөөд Эрдэнэт хотын захирагч Б.Зоригтбаяр мэндчилгээ дэвшүүллээ. 

Эрдэнэт...
Эх орны минь эрдэнийн сондор
Элгэн түмний минь хайрын сүндэр
Эрин зууны манлай бүтээн байгуулалт
Илгээлтин эзэд, анхдагчдын алдар аа.
Зууны манлай бүтээн байгуулалт Эрдэнэт хотын иргэд Та бүхэндээ Эрдэнэт хотын болон Анхдагч илгээлтийн эздийн өдрийн баярын мэнд хүргэе!

Эрдэнэтийн их бүтээн байгуулалт Эрдэнэтийн овооны арын хөндийд 1973 оноос эхэлж, 1974 онд Булган аймгийн Эрдэнэт хороо нэртэйгээр анх  байгуулагдсан түүхтэй. 
Хорооны хурдацтай хөгжил, хүн амын өсөлтийг харгалзан Ардын Их Хурлын Тэргүүлэгчдийн зарлигаар 1975 оны арвахноёрдугаар сарын 11-нд “Эрдэнэт хот” болгон зохион  байгуулах шийдвэрийг гаргаснаар Монгол Улсын гурав дахь хот болон хөгжлийн шинэ үе эхэлсэн билээ. 

Булган аймгийн Эрдэнэт хороог “Эрдэнэт хот”  болгон шийдвэрлэсэн энэхүү өдрийг 2017 онд аймгийн ИТХ-ын аравдугаар сарын 27-ны өдрийн 01 дүгээр тогтоолоор  “Эрдэнэт хотын өдөр, Анхдагч илгээлтийн эзэд”-ийн   өдөр болгож, жил бүрийн арванхоёрдугаар сарын 11-нд  хамтатган тэмдэглэхээр шийдвэрлэсэн юм. Өнөө жил бид  долоо  дахь жилдээ энэхүү түүхэн өдрийг тэмдэглэн өнгөрүүлж байна. 

    Энэ жил ихээхэн онцлогтой жил болж байна.  Бид бүхэн Илгээлтийн эзэд, Анхагдагчдынхаа  алдар гавъяаг алдаршуулах, хүндэтгэх зорилгоор Эрдэнэтийн ордыг нээж Эрдэнэт хот, Эрдэнэт үйлдвэрийг бүтээн босгосон “Анхдагч Илгээлтийн эздийн 50 жил”- ийн ойг аймгийнхаа баяр наадамтай хамт өргөн дэлгэр тэмдэглэлээ. 
 50 жилийн ойг тохиолдуулан Орхон аймаг, Эрдэнэт үйлдвэрийн хамтын ажиллагааны хүрээнд 2.2 тэрбум төгрөгийн санхүүжилтыг Улсын баатар “Эрдэнэт үйлдвэр” ТӨҮГ-аас шийдвэрлэн, илгээлтийн эзэд, анхагдагчид болон нийт 13812 ахмад настанд тус бүр 140-280 мянган төгрөгийн урамшуулал олголоо. 

Эрдэнэт үйлдвэрийнхээ хамт олон уурхайчиддаа баярлалаа. 

      Илгээлтийн эзэд Эрдэнэтийн анхдагчид Та бүхэн 50 жилийн түүхэнд тодоор дуурсагдах, амжилтын эзэд алдар гавъяатнууд билээ. 
Зууны манлай бүтээн байгуулалт Эрдэнэт хот нь 1976 оноос хойш өнөөг хүртэл өнгөрсөн 48 жилийн хугацаанд улс орны эдийн засаг, нийгмийн хөгжилд бодитой хувь нэмэр оруулдаг, боловсрол, эрүүл мэнд, спорт соёл урлаг, аж үйлдвэрийн томоохон төв болон хөгжиж байна. Эрдэнэт хот  анх байгуулагдахдаа 1600 өрхийн 7800 гаруй хүн амтай байсан бол өдгөө 29,1 мянган өрхийн 105,7 мянган суурин хүн амтай, эх орны өнцөг булан бүрээс иргэд ирж суурьшсан, хүний хөгжлийн индекс, өрсөлдөх чадварын үзүүлэлтээрээ Монгол Улсдаа тэргүүлсэн хот боллоо.

Энэхүү амжилт нь “Эрдэнэт үйлдвэр”, Эрдэнэт хотын аж ахуйн нэгж байгууллагууд, ард иргэдийн хүчээл зүтгэлийн үр дүн юм.  Долоо дахь жилдээ тэмдэглэж буй Эрдэнэт хот, Анхдагч илгээлтийн эздийн баярын өдрөөр олон үйл ажиллагааг зохион байгуулж байна. 

Монгол Улсын Засгийн газраас 2023-2025 оныг Монголд зочлох жилээр зарласан билээ. Энэ хүрээнд бид аймаг орон нутгийнхаа онцлогт тохируулан уул уурхайн салбарын аялал жуулчлалыг хөгжүүлэх, сурталчлах зорилгоор “Зэс фестиваль” арга хэмжээг хамтатган зохион байгуулж  буйгаараа онцлог болж байна.  Орхон аймаг, Эрдэнэт хотынхоо иргэн бүрт “Эрдэнэт хотын болон Анхдагч илгээлтийн эзэд”-ийн  өдрийн баярын мэндийг дахин дэвшүүлье.  

Та бүхний үйл нь бүтэж, үйлс нь дэлгэрч явахын ерөөлийг өргөе.