Эрүүл мэндийн байгууллагуудад хяналт шалгалт хийж эхэллээ
Д.Лхам
Үйл явдал
/
2 сарын өмнө
Эрүүл мэндийн даатгалын ерөнхий газраас 7 хоног бүр “Эрүүл мэндийн байгууллагаас эрүүл мэндийн тусламж үйлчилгээг худалдан авах” гэрээ байгуулсан эрүүл мэндийн байгууллагуудын гэрээний хэрэгжилтийг хангуулах зорилгоор газар дээрх хяналт шалгалтыг тогтмол зохион байгуулдаг.
 
Өнгөрсөн долоо хоногт нийслэлийн 5, орон нутгийн 19, молекул биологийн лабораторид 2021 оны 07 дугаар сарын 20-31-ний өдөр хүртэл 10 хоногт сорьцод ПГУ Cov-SARS 2 шинжилгээ хийсэн санхүүжилтийг Эрүүл мэндийн сайд, Сангийн сайдын хамтарсан 2021 оны “Журамд нэмэлт оруулах, төлбөрийн хэмжээг шинэчлэн батлах тухай” тушаалын дагуу нэхэмжилсэн эсэхэд газар дээрх хяналт, шалгалтыг хийсэн.
 
Хяналт шалгалтаар эрүүл мэндийн байгууллагууд tandalt.gov.mn програмд сайн дураар шинжилгээнд хамрагдсан иргэдийг зорилтот гэж бүртгэсэн, давхар шивсэн, зорилго тодорхойгүй гэж бүртгэсэн, хувийн лабораторийн сорьцод шинжилгээ хийсэн зэрэг нийт 3394 тохиолдлын 170 орчим сая төгрөгийн санхүүжилтийг илүү нэхэмжилсэн зөрчил илэрсэн юм.
 
Иймд өнөөдрөөс эхлэн ХӨСҮТ, ЗӨСҮТ, УНТЭ, 8 дүүргийн эрүүл мэндийн төв зэрэг 11 байгууллагын молекул биологийн лабораторид 2021 оны 7 дугаар 01-31-ний хооронд сорьцод ПГУ шинжилгээ хийсэн санхүүжилтийг дээрх хамтарсан тушаалын дагуу нэхэмжилсэн эсэхэд газар дээрх өргөжүүлсэн хяналт шалгалтыг 7 хоногийн турш хийхээр ажиллаж байна.
 

Сэтгэгдэл
Анхаар! Уншигчдын бичсэн сэтгэгдэлд http://ulsturch.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.