Монгол Улсын Ерөнхий сайд Л.Оюун-Эрдэнэ Дархан-Уул аймгийн иргэдтэй уулзаж “Шинэ сэргэлтийн реформ” илтгэлээ танилцуулж, санал хүсэлтийг нь сонслоо. Засгийн газар улс орны хөгжлийг хязгаарлаж буй хүчин зүйлийг шийдвэрлэх зорилтыг “Шинэ сэргэлтийн бодлого”-д тусгасан. “Шинэ сэргэлтийн бодлого”-ыг Улсын Их Хурлаар баталж, хэрэгжүүлж эхэлснээс хойш үр дүн гарч байна. ДНБ, нүүрсний болон бусад экспортын хэмжээ өсөж, төсвийн орлого нэмэгдлээ. 2020 онд -4.6хувь байсан эдийн засгийн өсөлт 2023 оны хоёрдугаар улиралд 6.4 хувьд хүрлээ. Нэг хүнд ногдох ДНБ 2000 онд 485 ам.доллар байсан бол 2022 онд анх удаа 5000 ам.доллар боллоо. Энэ жил улсын хэмжээнд нэгжийн ургац сүүлийн 10 жилд хамгийн өндөр хэмжээнд хүрч, урьдчилсан балансаар 480 мянган тонн улаан буудай хураан авч, өмнөх оноос 20 орчим хувь өсөхөөр байна. Хүнсний ногооны үйлдвэрлэл ч 165.8 мянган тонн буюу 18.3 хувь нэмэгдэх төлөвтэй байна. Засгийн газар баялгийн тэгш хуваарилалтад анхаарч, баялгийн реформыг хэрэгжүүлж байна. Эрдэнэт үйлдвэрийн 49 хувийг хууль зөрчин хувьд авсан нь тогтоогдсон тул 2017 онд төр 100 хувь мэдэлдээ авсан. Хувьд байх үед буюу 2016 онд тус үйлдвэр улсын төсөвт 184 тэрбум төгрөг татварт хураалгадаг байсан бол 2019 онд 962 тэрбум, 2022 онд 1,8 их наяд төгрөг төвлөрүүлээд байна. Дарханы төмөрлөгийн үйлдвэр дээр “Кью Эс Си” ХХК концессын гэрээ 2014 онд байгуулсан боловч гэрээний үүргээ биелүүлээгүй. Засгийн газар гэрээг цуцлах үед 9,6 тэрбум төгрөгийн алдагдалтай байсан үйлдвэр энэ оны наймдугаар сард 17,3 тэрбум төгрөгийн цэвэр ашигтай ажиллаад байгаа зэргийг Ерөнхий сайд Л.Оюун-Эрдэнэ онцоллоо.

Тэрбээр илтгэлдээ "Монголд шударга шүүх байгуулахын тулд хатуу тэмцэнэ. МАНАН бүлэглэлийнхэн өнөөдөр ч бууж өгөхгүй байна. Тэд хууль, шүүхийг худалдаад авчихсан. Тэдний томилгооны шүүгч нар өнөөдөр ч хүчтэй байна. Эздээ л хамгаалдаг. Энгийн иргэн найман ишигний хэргээр чанга ял эдлэж байхад эрх мэдэлтний хэрэг найман жил шүүх дээр нам гацдаг тогтолцоог өөрчлөх ёстой. Бид ийм зүйлийг хийнэ. МАНАН бүлэглэл гэхээр хоёр нам хамтарч Засаг барихыг ойлгоод байна. Гэтэл тийм биш. Хоёр нам дотор байгаа хөрөнгөтэй хүмүүс шүүх засаглалтай нийлчихээд сонгууль болгоноор гарч ирээд байгаа юм. Хоёр нам бол цаашдаа ч олон жил хамтарч Засаг байгуулна. Сүү нь дууссан саалийн үнээ гэгдэх "ЭРДЭНЭТ ҮЙЛДВЭР" өнөөдөр улсын төсөвт дангаараа 1,8 их наядын орлого төвлөрүүлж байна. Хувьд байхдаа дунджаар 950 орчим тэрбумыг л өгдөг байсан. Тэгэхээр энэ хэмжээний мөнгө улстөрчдийн сонгуулийн мөнгө болчихдог байсан гэсэн үг. Надад мэдээлэл ирсэн. Энэ уулзалтыг үймүүлэхээр зарим хүмүүс ирсэн. Та нар уулзалт үймүүлж байхаар Ч.Сайханбилэг, Д.Эрдэнэбилэг нарыгаа авчирч уулзуул. Би төлөөний хүмүүстэй нь уулзахгүй. Шударга үнэн, шударга шүүхтэй болохын төлөө бид тэмцэнэ. Ордонд хүч мөхөсдвөл ард түмэнтэйгээ хамт ТАЛБАЙ ДЭЭР СУУЛТ ХИЙНЭ гэдгийг дахин хэлмээр байна. Шударга ёсны тэмцэлд ард түмэн та нарын минь дэмжлэг чухал шүү" гэлээ. 

Дархан-Уул бие даан төсвөө бүрдүүлдэг цөөн аймгуудын нэг, 2022 онд төсвийн орлого 60,1 тэрбум төгрөг төвлөрүүлж 1,9 тэрбум төгрөгөөр давуулан биелүүлжээ. Тус аймаг 2023 оныг “Ажлын байр нэмэгдүүлэх, хөдөлмөр эрхлэлтийг дэмжих”, “Хүүхэд хамгааллын жил” болгон зарлаад байна. 2035 он гэхэд хүн амынхаа 80 хувийг орон сууцжуулах зорилго тавьжээ. Дархан-Уул аймгийн иргэд арьс ширнээс эхлээд уул уурхайн боловсруулах үйлдвэр байгуулах, хөгжлийн бэрхшээлтэй иргэдийг ажлын байраар хангах, орон сууцанд хамрагдахад дэмжлэг үзүүлэх, засаг захиргааны удирдлагад төлөөлөл оруулах, сургууль, цэцэрлэгүүдэд их засвар хийх, иргэдэд газар өмчилж авах боломж олгох, төрийн дунд, доод шатны ажилтан албан хаагчдын чадавхыг сайжруулах, татвар, нийгмийн даатгалын шимтгэлийн хувь хэмжээг бууруулах, банкны зээлийн хүүг бууруулах, хариуцлагын тогтолцоог сайжруулах, шүүхийн шинэчлэл хийх зэрэг асуудлыг хөндөн ярилаа. Ерөнхий сайд болон холбогдох сайд нар иргэдийн асуултад хариулж мэдээлэл өглөө.

Засгийн газар боловсруулах үйлдвэрийг дэмжинэ, хөгжлийн бэрхшээлтэй иргэдийн төлөөллийг парламентэд оруулах санаачилгыг МАН гаргаж жагсаалтын эхний тавд хөгжлийн бэрхшээлтэй иргэдийн төлөөллийг багтаахаа зарлаж бусад улс төрийн намуудад уриалсан, боловсрол, эрүүл мэндийн салбарт онцгой анхаарч тухайлбал, багш мэргэжлээр суралцах оюутнуудын сургалтын төлбөрийг тодорхой журмын дагуу төр даах шийдвэр гаргасан, орон нутагт шилжин суурьших, ажиллах иргэдийг бүх талаар дэмжих талаар Ерөнхий сайд ярилаа. Мөн Засгийн газар шинэ төслөөс илүү өмнө эхлүүлсэн төслүүдийг бүрэн дуусгах зарчим барьж ажиллаж байгаа. Гэхдээ шаардлагатай шинэ төслүүдийг санхүүжүүлнэ. Дархан-Уул аймгийн “Залуус” хорооллын шинэ сургууль, цэцэрлэг, аймгийн хэмжээнд байгаа их засвар шаардлагатай цэцэрлэгүүдийн засварын санхүүжилтийг үе шаттай шийдвэрлэнэ. Мөн тус аймгийн төвийн нийтийн тээвэрт 20 шинэ автобус өгөхөөр боллоо.

Дархан-Уул аймгийн иргэд 2024 оны улсын төсөвт дараах төслүүдийг тусгуулахаар эрэмбэллээ. Эдгээрээс хамгийн олон санал авсан төслүүдийг улсын төсвөөс санхүүжүүлнэ.

1.    Түрээсийн орон сууц
2.    Үерийн байгууламж барих
3.    “Залуус”хороололд сургуулийн барилга
4.    Сургуулийн барилга 480 суудал /Дархан-Уул, Орхон сум/
5.    “Залуус”хороололд 150 ортой цэцэрлэгийн барилга
6.    “Залуус-1,2”хорооллын инженерийн шугам сүлжээ, автозамын үргэлжлэл
7.    Сургуулийн барилгын өргөтгөл  
8.    Өвлийн спортын ордон
9.    31-р хорооллын дулаан хангамж
10. Аймгийн төвийн дахин төлөвлөлтөөр Гэр хорооллын доторх хатуу хучилттай авто зам хоёр үе шатны ажил