НЗДТГ-ын Нийгмийн бодлогын хэлтэс, Нийслэлийн Гэр бүл, хүүхэд, залуучуудын хөгжлийн газар, Эрүүл мэндийн газар, “Бяцхан тэмүүлэл” хүүхдийн сэргээн засах төв хамтран АШУҮИС-ийн I-VI дамжааны 50 оюутныг эрүүл мэндийн сайн дурын ажилтнаар бэлтгэх хөтөлбөрт хамруулж, батламж гардууллаа.

Батламж гардуулах үеэр Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч, Нийслэлийн Залуучуудын хөгжлийн салбар зөвлөлийн дэд тэргүүн З.Төмөртөмөө “Залуучуудын хөдөлмөр эрхлэлт, нийслэлийн хөгжилд залуучуудын оролцоог нэмэгдүүлэх зорилгоор тэдний гаргасан санал санаачилгыг дэмжин ажиллаж байна. Энэ хүрээнд энэ онд таван их сургуулийг сонгон авч, 800 гаруй оюутан, залуустай уулзан, оюутнуудад чиглэсэн цагийн ажлын байрыг бий болгох, нийгэмд чиглэсэн үйл ажиллагаа зохион байгуулж байна. Үүний нэг хэсэг болгон, хөгжлийн бэрхшээлтэй, чадвар алдалттай хүүхдүүдэд хүрч, эрүүл мэндийн тусламж, үйлчилгээг ойлтуулах энэхүү Эрүүл мэндийн сайн дурын ажилтан бэлтгэх хөтөлбөрийг эхлүүлсэн билээ. Уг хөтөлбөр нь оюутан залууст цагийн ажлын байрыг бий болгохоос гадна, ажлын байранд дадлагажих, суралцах, нийгмийн харилцаанд бэлтгэх олон талын ач холбогдолтой, үр дүнтэй ажил боллоо. Иймд тус ажлыг цаашид ч мөн үргэлжлүүлж, дэмжин ажиллах болно” хэмээлээ.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС