Хөдөлмөр, нийгмийн хамгааллын дэд сайд С.Зулпхараар ахлуулсан яам, агентлагийн төлөөллөөс бүрдсэн салбар дундын ажлын хэсгийн гишүүд тус конвенцын хэрэгжилтийг хангах хүрээнд хөгжлийн бэрхшээлтэй хүний эрхийг хангаж, оролцоог нэмэгдүүлэх чиглэлээр 2012 оноос хойш хэрэгжүүлсэн үйл ажиллагааны тайлан, Хөгжлийн бэрхшээлтэй хүмүүсийн эрхийн хорооноос Монгол Улсад ирүүлсэн зөвлөмж, мөн хорооноос ирүүлсэн 54 богино асуумжийн  дагуу тайланг хэлэлцүүлсэн  юм.

Тус хэлэлцүүлэгт Онцгой байдлын ерөнхий газрын Урьдчилан сэргийлэх газрын дарга, хурандаа Ц.Уранчимэг оролцож, Нэгдсэн үндэстний байгууллагын “Хөгжлийн бэрхшээлтэй хүмүүсийн эрхийн тухай конвенц”-ын 11 дүгээр зүйл буюу “Хүмүүнлэгийн гамшиг болон эрсдэл бүхий нөхцөл байдал”-ын үед Онцгой байдлын байгууллагаас хөгжлийн бэрхшээлтэй иргэдийн талаар авч хэрэгжүүлж байгаа арга хэмжээний тайланг хамгааллаа.

Дашрамд дуулгахад, Монгол Улс 2008 онд Хөгжлийн бэрхшээлтэй хүмүүсийн эрхийн тухай НҮБ-ын Конвенц, түүний нэмэлт протоколыг соёрхон баталж, конвенцын үзэл баримтлал, зарчимд нийцсэн Хөгжлийн бэрхшээлтэй хүний эрхийн тухай хуулийг батлан хэрэгжүүлж байна.   

Анхны тайланг 2011 онд НҮБ-ын Хөгжлийн бэрхшээлтэй хүмүүсийн эрхийн хороонд илгээсэн бөгөөд тус тайланг 2015 онд хэлэлцэж, Засгийн газарт 37 зөвлөмж, 3 шаардлага, 1 хүсэлт ирүүлсний дагуу Засгийн газрын 2013 оны 281 дүгээр тогтоолоор “Конвенцыг 2013-2016 онд хэрэгжүүлэх арга хэмжээний төлөвлөгөө”-г батлан хэрэгжилтийг ханган ажилласан. 

Түүнчлэн 2018 онд НҮБ-ын Хөгжлийн бэрхшээлтэй хүмүүсийн эрхийн хорооноос ирүүлсэн 54 богино асуумжийн дагуу Засгийн газрын 2 болон 3 дугаар тайланг боловсруулж төр, төрийн бус байгууллагаар хэлэлцүүлэн 2019 оны 10 дугаар сард НҮБ-ын Хүний эрхийн хороонд хүргүүлсэн юм гэж Онцгой байдлын ерөнхий газраас мэдээллээ.