Сонгинохайрхан дүүргийн Засаг даргын Тамгын газраас хөгжлийн бэрхшээлтэй иргэдийн эрхийг хамгаалах олон улсын өдрийг угтан “Тэгш эрх-Тэгш оролцоо” аяныг зохион байгуулж байна. Аяны хүрээнд ЗДТГ-ын Нийгмийн хөгжлийн хэлтсээс хэд, хэдэн төлөвлөгөөт ажлыг хэрэгжүүлж байгаа бөгөөд төрийн албан хаагчдад дохионы хэлний анхан шатны мэдлэг олгох сургалтыг сэргээн засах сургалт үйлдвэрлэлийн төвийн сургагч багш нар болон мэргэжлийн дохионы хэлмэрч багштай хамтран зохион байгууллаа.

Сургалтад дүүргийн ЗДТГ, Нийгмийн даатгалын хэлтэс, Хөдөлмөр, халамжийн үйлчилгээний хэлтэс, Иргэний бүртгэлийн хэлтэс, Газрын зохион байгуулалтын алба, Нэгдсэн эмнэлэг, Эрүүл мэндийн төв болон хороодын зохион байгуулагч, нийгмийн ажилтнууд хоёр өдөр хамрагдсан юм. Тус албан хаагчдад өнөөдөр /2022.11.30/ Нийгмийн хөгжлийн хэлтсийн дарга Ч.Энххорол сертификат гардуулан, дохионы хэлний мэдлэгээ улам сайжруулан, хөгжүүлэхийг хүслээ.