Тус ёслолын арга хэмжээг Монгол Улсын Шадар сайд С.Амарсайхан нээж хэлсэн үгэндээ “Монгол Улсын урт, дунд хугацааны бодлогын бичиг баримтуудад туссаны дагуу Монгол Улсын Засгийн газар “Цахим Үндэстэн” болох зорилтыг тавин бүтцийн болон тогтолцооны өөрчлөлтүүдийг хийж, хууль эрх зүйн шинэчлэлүүдийг эрчимтэй эхлүүлэн ажиллаж байна.

Тухайлбал, Улсын Их Хурлаас цахим хөгжлийг дэмжсэн багц хуулиудыг баталлаа. Эдгээр хуулиудын хэрэгжилтийг хангаж ажиллах болон цахим шилжилтийг эрчимжүүлэх зорилгоор Засгийн газрын бүтцэд Цахим Хөгжил, Харилцаа Холбооны Яамыг байгуулж, өдгөө нэг жил болж байна. Энэ хугацаанд тус яам Төрийн бүтээмжийг нэмэгдүүлэх, төрийн хүнд суртал, шударга бус явдлыг таслан зогсоох чиглэлд онцгой анхаарал хандуулж “Төрийн цахим шилжилт”-ийг эрчимжүүлэн, төрийн үйлчилгээний “E-Mongolia” цахим платформыг хөгжүүлэх зэрэг ажлуудыг амжилттай хийж хэрэгжүүлж байна.

Түүнчлэн "И-Монгол" Академийг шинээр байгуулж төрийн үйлчилгээг цахимжуулах, хуулийн хэрэгжилтийг хангуулах хүрээнд суурь болон дэмжих системүүдийг эрчимтэй хөгжүүлж, салбар хоорондын уялдаа холбоог ханган ажиллаж байгаа билээ.

Тэгвэл Өнөөдөр бид хамтдаа цахим шилжилтийн томоохон алхам болсон Программ хангамжийн их дэлгүүр Mindgolia цахим платформыг нээж түүхийн бас нэгэн шинэ хуудсыг эхлүүлж байна.

Энэхүү платформыг нэвтрүүлснээр төрийн байгууллага төсвийн хөрөнгөөр мэдээллийн технологи, програм хангамжийн худалдан авалт хийхдээ нэн тэргүүнд дотоодын компаниудынхаа үйлдвэрлэсэн бүтээгдэхүүн, үйлчилгээг худалдан авдаг байх боломжийг бүрдүүлж буйгаараа чухал алхам гэж үзэж байна” гэлээ.

Тус системд одоогийн байдлаар 100 гаруй компанийн 180 орчим бүтээгдэхүүн байршсан ба өдрөөс өдөрт нэмэгдэж байна. Монгол инженерүүдийн оюун ухаанаар бүтсэн программ хангамжийн их дэлгүүрээс өөрт хэрэгтэй бүтээгдэхүүнийг сонгоход энэ систем туслах юм байна.

Уг системийг хөгжүүлж туршсан сүүлийн 30 хоногт 5 төрлийн 4,5 тэрбум төгрөгийн системийг 21 аймгийн 248 ЕБС хэрэглэснээрээ төлбөрийг нь төлөх нөхцөлтэйгөөр худалдан авчээ.