Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа “Нийслэлийн Засаг даргын захирамжийн дагуу Захирагчийн ажлын албанаас Ажлын хэсэг байгуулж, Нийслэлийн Хүнс, хөдөө аж ахуйн газар, Онцгой байдлын газар, Цагдаагийн удирдах газар, Байгаль орчны газар, Мал эмнэлгийн газар, Дотоодын цэргийн 805 дугаар анги, Богдхан уулын Дархан цаазат газрын хамгаалалтын захиргаа, Үндэсний цэцэрлэгт хүрээлэн, дүүргийн ЗДТГ зэрэг байгууллагуудын бүрэлдэхүүнтэй төвийн зургаан дүүрэгт 535 албан хаагч 93 автомашин, 27 эргүүлтэйгээр ажиллаж байна. Өнгөрсөн хугацаанд нийслэлийн мал аж ахуй эрхлэхийг хориглосон бүсээс 6385 малыг тууж гаргасан. Цагдаагийн байгууллагаас хоёр иргэнд торгуулийн арга хэмжээ авлаа. Мөн малчидтай уулзаж, санал хүсэлт, нөхцөл байдлыг нь сонссон.

Налайх дүүрэг, 61-ын гарам болон Улаанбаатар хотыг тойрсон Төв аймгийн сумдаас мал их орж ирж байгаа. Нийслэлийн ойролцоох зарим сумдад малын гоц халдварт өвчин гарсан. Хуулийн дагуу малын гоц халдварт өвчин гарсан газарт хязгаарлалт тогтоодог. Ийм нөхцөл байдал үүсгэхгүйн тулд шаардлагатай арга хэмжээг авч байна. Мөн ногоон байгууламж руу мал орж идэх, эвдэж сүйтгэх тохиолдол гарсан. Түүнчлэн замын хөдөлгөөнд ч хүндрэл учруулж, зам тээврийн осол гарах нөхцөл үүссэн. Тухайлбал, төмөр замын бүс рүү мал орж, дайруулсан. Дээрх шалтгаан, нөхцөл байдлаас үүдэн малыг хотоос гаргах арга хэмжээг яаралтай авч байна. Энэ дагуу төлөвлөгөө гаргаж, долоо хоногт 2-3 удаа кампанит ажлыг зургаан дүүрэгт зохион байгуулж, үр дүнтэй байхад анхаарч, хуваарь гарган ажиллаж байгаа. Дөрөвдүгээр сарын эхэн хүртэл дээрх ажлыг зохион байгуулахаар төлөвлөсөн. Зургаан дүүргийн 10 маршрутын дагуу малыг тууж гаргаж байгаа. Өмнө нь холбогдох албаныхан явган тууж, нэг дүүргээс нөгөө рүү мал ордог байсан. Энэ удаа хотын эргэн тойронд мал аж ахуй эрхэлж байгаа малчидтай хамтран малыг гаргаж байна” хэмээлээ.

Мөн энэ үеэр сэтгүүлчдийн асуултад хариулт өгсөн юм. Тухайлбал, давсанд хийсэн шинжилгээний хариу гарсан эсэхийг тодруулахад Ерөнхий менежер М.Баяраа “Шинжилгээний хариу 95 хувийн давсны орцтой гэж гарсан. Давс маш их бохирдолтой, шавар, хог шороотой, мөстэй нийлүүлэгдсэн. Манайхаас компанид мэдэгдэл хүргүүлж, чанарын шаардлага хангасан давсаар солих шаардлага тавьсны дагуу сольж өгөхөөр болсон” гэлээ.

Энэ үеэр НЗДТГ-ын хэвлэлийн төлөөлөгч Н.Сугар “Улаанбаатар хотын суурьшлын бүсэд мал орж ирэх нь маш том эрсдэл дагуулж байдаг. Улсын хүн амын тал хувь нь оршин сууж байгаа нийслэлд халдварт өвчин гарвал хөл хорио тогтоох, нүүлгэн шилжүүлэлт хийх гэх мэт зардал ихтэй, өндөр эрсдэлтэй” хэмээсэн юм.

Мөн малыг хотоос гаргаж байгаа нь Улаанбаатар хотын 1.6 сая иргэнээ бодсон шийдвэр. Тиймээс нийслэлийн ойролцоо мал малладаг, мөн отор хийж байгаа малчид малаа хараа хяналттай байлгах шаардлагатайг онцоллоо.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС