Олон хоног үргэлжилж буй усархаг борооны улмаас нийслэл хотын хэд хэдэн байршил үер, усны аюулд өртөөд байгаа билээ. Үүнтэй холбогдуулан Сонгинохайрхан дүүрэг гамшгаас хамгаалах өндөржүүлсэн бэлэн байдлын зэрэгт шилжин бүрэн бүрэлдэхүүнээрээ ажиллаж байна. Өнөөдөр өглөөний 06 цагийн үед 9, 25, 26, 40, 42 дугаар хороод үерт автаж эхэлсэн бөгөөд дүүргийн удирдлагууд цаг алдалгүй арга хэмжээ авч, хүн хүч, техник тоног төхөөрөмжийн хуваарилалтаа хийн ажиллаж байгаа юм.

 

Тухайлбал, дүүргийн Онцгой байдлын хэлтсийн 20 албан хаагч, 2 авто машин, ус соруулдаг 4 помп, Онцгой байдлын ерөнхий газраас нэмэлтээр 10 албан хаагч, дүүргийн Захиалагчийн ажлын алба ОНӨААТҮГ-ын 30 хүн, 6 кран, 1 экскаватор, 2 ус соруулагч автомашин, Дэд бүтцийн хөгжлийн алба ОНӨААТҮГ-аас 3 хово, экскаватор, кран, 8 хүний хамт, Тохижилт цэвэрлэгээ үйлчилгээ ОНӨААТҮГ 3 авто машин 25 хүн, түрээсийн 2 экскаватор, Цэргийн штабаас 14 хүний бүрэлдэхүүнтэйгээр нийт 25 техник хэрэгсэлтэй нөхцөл байдал дээр шуурхай арга хэмжээ авч үерийн далан босгох, сэргээх, суваг шуудуу татах ажлыг гүйцэтгэж байгаа юм. Мөн дүүргийн эрүүл мэнд, сургууль, цэцэрлэг, хороод, дэргэдэх хэлтэс, тасаг, албадын нийт 136 төрийн байгууллагын 515 хүн одоогийн байдлаар 3800-аад шуудай шороог бэлтгэн, үерт нэрвэгдэж буй хороод руу ачиж тээвэрлэж байна. Нэмэлтээр Хөдөлмөр халамж үйлчилгээний хэлтсийн цалинтай 70 иргэн, улаан загалмайн хорооны сайн дурын 18 иргэн ажиллаж байна. Сонгинохайрхан дүүргийн хэмжээнд үерт нэрвэгдсэн хороодод нийт 138 төрийн байгууллагын 560 гаруй албан хаагчид ажиллаж байна.