Японы парламентын болон хууль тогтоох үйл ажиллагааны туршлага судалж буй Улсын Их Хурлын Ерөнхий нарийн бичгийн дарга Л.Өлзийсайхан өнөөдөр тус улсын парламентын Зөвлөхүүдийн танхимын Ерөнхий нарийн бичгийн дарга, эрхэмсэг ноён Кобаяаши Фүмитакэ-тэй уузлаа. Тус танхим 248 гишүүнтэй бөгөөд гишүүдийн тавин хувь нь гурван жил тутам шинээр сонгогдож, бүрэн эрхээ зургаан жилээр хэрэгжүүлдэг байна.

Ерөнхий нарийн бичгийн дарга Л.Өлзийсайхан Монгол, Япон хоёр улс дипломат харилцаа тогтоосон 50 жилийн хугацаанд харилцаа, хамтын ажиллагаагаа стратегийн түншлэл хүртэл хөгжүүлж ирснийг тэмдэглээд, уг харилцааг цаашид улам өргөжүүлэн гүнзгийрүүлэхэд хууль тогтоох байгууллагуудын найрсаг, идэвхтэй, бүтээлч хамтын ажиллагаа чухал үүрэгтэйг онцлов. Энэ оны гуравдугаар сард Монгол Улсын Их Хурлын дарга Г.Занданшатар тус улсын Парламентын Зөвлөхүүдийн танхимын дарга Х.Оцүжи-гийн урилгаар айлчилж, хууль тогтоох байгууллагуудын харилцаа, хамтын ажиллагааг гүнзгийрүүлэн хөгжүүлэх, итгэлцлийг бэхжүүлэхэд чухал түлхэц болсныг Ерөнхий нарийн бичгийн дарга дурдаад, уг айлчлалын хүрээнд хоёр улсын стратегийн түншлэлийн хөтөлбөрт тодорхойлсон “хүн төвтэй” харилцаа, хамтын ажиллагааг бүхий л салбарт бэхжүүлэх үзэл санааг бататгасныг тэмдэглэлээ. Энэ хүрээнд иргэд хоорондын харилцааг өргөжүүлж, хүний нөөцийн чадавхыг нэмэгдүүлэх зэргээр хоёр улсын Парламентын Тамгын газар хоорондын хамтын ажиллагааг идэвхжүүлэх боломж бийг тэрбээр ярилаа.

Зөвлөхүүдийн танхимын Ерөнхий нарийн бичгийн дарга Кобаяаши Фүмитакэ, тус танхим болон Монгол Улсын Их Хурал хоорондын харилцаа найрсаг, идэвхтэй өрнөж буйг өгүүлээд, харин Тамгын газар хооронд тухайлсан хамтын ажиллагааны баримт бичиг байхгүйг дурдав. Гэсэн хэдий ч өмнө Зөвлөхүүдийн танхимын Тамгын газарт Монгол Улсын Их Хурлын Тамгын газрын мэргэжилтнүүдийг дадлагажуулж, туршлага судлуулж байсан уламжлал бийг онцолсон юм. Мөн тэрбээр Монгол Улсын Үндсэн хуульд оруулсан нэмэлт, өөрчлөлтүүд болон "КОВИД-19" цар тахлыг даван туулсан Улсын Их Хурлын Тамгын газрын арга, туршлагын талаар асууж ярилцав.

Түүний асуултад Ерөнхий нарийн бичгийн дарга Л.Өлзийсайхан тодорхой хариулт өгч, ялангуяа КОВИД-19 цар тахлын үед Улсын Их Хурлын чуулганы хуралдаан, гишүүдийн үйл ажиллагааг тасралтгүй явуулах боломжийг хэрхэн бүрдүүлсэн, мөн Монгол Улсын Үндсэн хуульд оруулсан энэ удаагийн өөрчлөлтөөр парламентын бүтцийг шинэчлэн тогтоосон талаар танилцуулав. Улсын Их Хурлын гишүүдийн тоог дараагийн парламентаас эхлэн нэмэгдүүлэх бэлтгэлийг хангах хүрээнд Японы болон бусад улс орны парламентууд, Тамгын газруудын туршлага, чадавх, мэдлэгт суралцах шаардлага тулгарч буй талаар тэрбээр өгүүлээд, энэ талаар болон цаашид парламентат ёсны хөгжлийг хангах чиглэлээр хамтран ажиллах саналтай байгаагаа илэрхийллээ. Эрхэмсэг ноён Кобаяаши Фүмитакэ-г Улсын Их Хурлын Тамгын газарт зочлохыг Ерөнхий нарийн бичгийн дарга Л.Өлзийсайхан уриад, хоёр Тамгын газар хооронд хамтран ажиллах санамж бичгийг Монгол Улсад байгуулах саналтай байгаагаа дурдлаа.

Уулзалтын дараа Ерөнхий нарийн бичгийн дарга Л.Өлзийсайхан тэргүүтэй Улсын Их Хурлын Тамгын газрын төлөөлөгчид Зөвлөхүүдийн танхимын Хууль, эрх зүйн газрын үйл ажиллагаатай танилцаж, эдгээр нэгжийн удирдлага, мэргэжилтнүүдээс хууль боловсруулахаас эхлээд батлагдах хүртэлх үйл явц, эрдэмтэд, олон нийтийн саналыг тусгах, мөн Зөвлөхүүдийн танхимын бүтэц, Үндсэн хуулийн эрх зүй зэрэг өргөн хүрээний асуудлаар мэдээлэл солилцлоо.

Түүнчлэн Мэдээлэл, сурталчилгааны хэлтсийн Парламентын боловсрол хөтөлбөр (Parliamentary Study Program)-ийн сургалтын танхимд зочилж, өсвөр үеийнхэнд парламентат ёсны анхан шатны мэдлэг олгох, мэтгэлцэх, хэлэлцэх арга зүйд сургах үйл ажиллагаатай танилцав. Уг хөтөлбөрт хамрагдаж буй хүүхдүүдээс заримыг нь парламентын дарга, илтгэгч, Байнгын хорооны гишүүдэд томилж, тодорхой сэдвээр хэлэлцүүлэн, шийдвэрлүүлж, парламентын хуралдааны үйл ажиллагааг бодитоор мэдрүүлдэг байна. 2002 оноос эхэлсэн уг хөтөлбөрт өнөөдрийн байдлаар 1.3 сая хүүхэд, багачууд хамрагджээ.

Ерөнхий нарийн бичгийн дарга Л.Өлзийсайханы туршлага судлах ажлын багт Улсын Их Хурлын Тамгын газраас Швейцарийн хөгжлийн агентлагтай хамтран хэрэгжүүлж буй “Монгол Улсад парламентын ардчиллыг бэхжүүлэх нь” төслийн хүрээнд явуулж байгаа “Парламентын боловсрол” хөтөлбөрийн “Сургагч багш” дэд хөтөлбөрт хамрагдсан 141, 14 дүгээр сургуулийн түүх, нийгмийн ухааны багш Б.Баярмаа, Д.Дэлгэрмаа нар ажиллаж буй юм. Тэд Япон Улсын Парламентын боловсрол хөтөлбөртэй танилцаад, энэ талаарх өсвөр үе, залуучуудын ойлголт, мэдлэгийг дээшлүүлэх нь нийгэмд маш их ач холбогдолтойг онцолж байлаа.

Мөн Ерөнхий нарийн бичгийн дарга Л.Өлзийсайхан өнөөдөр Японы Парламентын номын санд зочилсон юм. Парламентат ёсны хөгжлийн хамгийн чухал хэрэглэгдэхүүн бол номын сан бөгөөд парламентын боловсрол болон иргэд, олон нийт ба хууль тогтоох байгууллагын харилцаанд онцгой үүрэг гүйцэтгэдэг. Японы Парламентын номын сан бие даасан хуультай, 900 гаруй ажилтантай, цахим, хүүхдийн гэсэн хоёр салбартай, улсын номын сангийн статустайгаар ажилладаг бөгөөд 45.0 сая гаруй номтой нийтийн номын сан юм.

Мөн тус номын сангийн бүтцэд Судалгааны байгууллага ажилладаг бөгөөд парламентын гишүүдийн захиалгаар бүхий л сэдэв, агуулгаар судалгаа, лавлагаа бэлтгэж өгдөг талаар номын сангийн дарга Ёшинага Мотонобү танилцуулав. Ерөнхий нарийн бичгийн дарга Л.Өлзийсайхан хоёр улсын Парламентын номын сангуудын хамтын ажиллагааг идэвхжүүлэх, харилцан арга туршлага болон мэдлэг, дадлагаа солилцож ажиллах саналтай байгаагаа илэрхийллээ.

Ерөнхий нарийн бичгийн дарга Л.Өлзийсайхан Япон Улсын Парламентын номын сангийн Хүндэт дэвтэрт дурсгалын үг бичиж, ноён Ёшинага Мотонобүд "Монголын нууц товчоо" номын тусгай хэвлэлтийг гардуулав.

 Улсын Их Хурлын Хэвлэл мэдээлэл, олон нийттэй харилцах газраас мэдээллээ.