Сэлэнгэ аймагт ажиллах үеэрээ Баянгол суманд байрлах “Бялхам Ивээл” ХХК-ийн хүлэмжийн аж ахуйтай танилцлаа. Тус аж ахуйн нэгж нь нийт 3 га ашигтай талбай бүхий зуны 66, үрслэгээний 24 хүлэмж болон задгай талбайд туршилт, судалгааны зорилгоор төмс, чихэрлэг төмс, навчит ногоо, усан үзэм зэрэг 30 гаруй төрлийн ногоо, жимс тариалдаг байна. Үүнээс 11 нэр төрлийн нарийн ногоог зах зээлд борлуулдаг.

Тухайлбал: чинжүү, хаш, тарвас, чихэрлэг төмс, хэрээний нүд, эрдэнэ шиш, хулуу, манжин, европ саримс, усан үзэм, чипсний төмс зэргийг дурдаж болно.

Чипсний төмсний хувьд 1 га-с 40-50 тонн хураах боломжтой төдийгүй экспортлох бүрэн боломжтой гэдгийг хүлэмжийн аж ахуй эрхлэгч БНСУ-ын иргэн Ким онцолж байлаа.

Манай улсад дээрх хүнсний ногоог химийн бордоогүйгээр ургуулж, органик хүнс хурааж авах хөрс болон цаг уурын давуу талтайг онцолж байлаа.