-Үйлдвэрийн газрын ажилчдын эрүүл мэндийн урьдчилан сэргийлэх үзлэг хэзээ эхэлсэн бэ?  

-2022 оны үзлэг шинжилгээ долдугаар сарын 05-нд эхэлсэн. Эрдэнэт үйлдвэрээр овоглосон нийт ажилчид, ахмадууд, мэргэжлээс шалтгаалах өвчний улмаас хөдөлмөрийн чадвар алдалтын хувь тогтоолгосон иргэд гээд 10 мянга гаруй хүнийг урьдчилан сэргийлэх үзлэгт хамруулахаар төлөвлөдөг. Одоогоор нийт ажилчдын 40 гаруй хувь нь эрүүл мэндийн урьдчилан сэргийлэх үзлэгтээ хамрагдаад байна.

-Эрүүл мэндийн үзлэг шинжилгээний багц жил бүр шинэчлэгддэг. Энэ жилийн онцлог..?      

-Энэ жил эрүүл мэндийн урьдчилан сэргийлэх үзлэг, шинжилгээний 17 багц гаргасан. Ажилчдын эрүүл мэндийн оношлогоонд зайлшгүй тодруулах шаардлагатай шинжилгээний үзүүлэлтүүдийг оруулж өгснөөрөө ач холбогдолтой. Түүнээс гадна мэргэжлээс шалтгаалах өвчний болон цацрагийн нөлөөний үзлэгүүдийг багтаан оруулсан нь онцлог. 

-Үзлэг ямар зохион байгуулалтаар явагдаж байна? 

-Амралтын улирал ерөнхийдөө дууссан учраас үзлэг шинжилгээ тасалдахгүй хэвийн үргэлжилж байна. Бид ажилчдын эрүүл мэндийн урьдчилан сэргийлэх үзлэгийг 12-р сарын 30-ны өдрөөр тасалбар болгохоор хуваарь гаргасан. Өдөртөө 60-70 ажилтан үзлэг шинжилгээнд хамрагдаад явж байгаа. Хүндэтгэх шалтгааны улмаас хуваарьт өдрөө эрүүл мэндийн үзлэгтээ орж амжихааргүй бол өмнө нь хэлж, дараагийн хүмүүстээ боломж олгох хэрэгтэйг энэ дашрамд анхааруулъя. 

-Эрдэнэт үйлдвэрийн ажилчдын эрүүл мэндийн урьдчилан сэргийлэх үзлэг олон жил явагдаж байна. Сүүлийн үед ажилчдын дунд ямар өвчлөл зохилж байна вэ?

-Эрүүл мэндийн урьдчилан сэргийлэх үзлэгийн сүүлийн таван жилийн дүнгээр халдварт бус өвчлөл буюу хувь хүний амьдралын хэв маягтай холбоотой өвчлөл өндөр хувь эзэлж байгаа. Үүн дотроо хоол боловсруулах замын болон зүрх судасны өвчлөл. Үүнд нөлөөлж буй эрсдэлт хүчин зүйл нь хөдөлгөөний хомсдолт, буруу хооллолт, архи, тамхины хэрэглээ, жингийн илүүдэл байна. Үүнээс урьдчилан сэргийлэх боломж, үйлчилгээ үзүүлэх орчин нөхцөл манайд бүрэн бий. Нийгмийн цехүүд хувь хүнд болон хамт олонд, зорилтот бүлэгт гэсэн чиглэлээр тусгайлсан хөтөлбөрүүд хэрэгжүүлдэг. Манай сувилал гэхэд “Тогтмол даралт”, “Тэгш нуруу”, “Миний эрүүл мэнд-миний гарт” зэрэг хөтөлбөр хэрэгжүүлсэн. Одоо бид архи, тамхины хэрэглээний эсрэг хөтөлбөр хэрэгжүүлж байна. Хувь хүн өөрөө хичээгээд, эрсдэлт хүчин зүйлээ бууруулж, амьдралын зөв хэв маяг сонгож чадвал Эрдэнэт үйлдвэрт хөдөлмөрийн чадвар алдалт гарахгүй байх боломжтой.  

-Та мэргэжлийн хүний хувьд эрүүл мэндийн урьдчилан сэргийлэх үзлэгийн үр дүнг хэрхэн дүгнэж байна?  

-Эрт оношлогоо талдаа өндөр ач холбогдолтой. Орчин үеийн “Эрдэнэт медикал” эмнэлгийн эмч, мэргэжилтнүүд өндөр хүчин чадалтай оношилгооны тоног  төхөөрөмж ашиглан эрүүл мэндийн үзлэг шинжилгээ хийж байгаа учраас өвчний илрүүлэлт эрт, оношлогоо зөв байгаад ажилчид сэтгэл хангалуун байдаг. Зүрх судасны өвчнийг 5-10 жилээр наана оношилдог болсон. Өөрөөр хэлбэл нас баралтыг 5-10 жилээр бууруулж байна гэсэн үг. Энэ бол маш том үр дүн. 

-Эрдэнэт үйлдвэрийн нэг ажилтан жилд хэчнээн төгрөгийн өртөгтэй эрүүл мэндийн үзлэг шинжилгээнд хамрагддаг вэ? 

-Эрүүл мэндийн үндсэн үзүүлэлт харах үзлэг шинжилгээнд анх 75000, 250 000 төгрөгийг нэг ажилтанд зориулдаг байсан. Одоо ерөнхий үзлэг дээр нэмэлт, илүү нарийвчилсан шинжилгээ багтаасан багцууд гаргасан. Сүүлийн таван жилийн дунджаар нэг ажилтанд 500.000-1.400 000 төгрөгийн өртөг бүхий нарийн үзлэг шинжилгээ хийж байгаа. Иймээс үзлэгт хамрагдах хувь хүний хариуцлага эрс сайжирсан. 

-Баярлалаа.