Хөгжлийн банкны хянан шалгах түр хороо дарга Ж.Сүхбаатар Засгийн газрын гишүүн болсон учир түр хорооны даргаар Б.Энхбаярыг  томилсон. Тэгвэл  ТҮР ХОРООНЫ төсвийг танасан асуудалд УИХ-ын гишүүн Б.Энхбаяр бухимдав. Тэрбээр өчигдөр /2022.10.19/ байнгын хорооны хуралдааны үеэр “УИХ, Засгийн газрын хяналт шалгалттай давхцуулж хяналт шалгалт хийгээд байх шаардлага юу ч байгаа юм. Бид давхар дээл нөмөрсөн. Энэ нь УИХ болон Засгийн газар нэг байгууллага боллоо гэсэн үг биш шүү. УИХ-ын зарим гишүүн сайдын ажлыг давхар хийж буй болохоос биш нэг институци нөгөө институцтэй нэг хөнжилд орж, завхайрч буй асуудал биш. Хууль тогтоох эрх мэдэл, гүйцэтгэх эрх мэдэл бие даасан байх ёстой. УИХ Монголын ард түмнээс мандат авсан байгууллага. Энэ утгаараа ард түмний нэрийн өмнөөс Засгийн газар төсвийг зөв зохистой зарцуулж байна уу гэдэгт хяналт тавих нь УИХ-ын хууль батлах ажлын нөгөө тал нь. Энэ 50 хувийн ажлаа, Засгийн газрын буюу шалгах гэж буй сайд нараас мөнгийг нь аваад шийд гэж юу яриад байгаа юм. Хөгжлийн банкны түр хороо олон сайдыг шалгана.

Хамгийн түрүүнд Сангийн сайдыг шалгана. Сангийн сайдаас өөрөөс нь мөнгө гуйх юм уу. Царай алдаж шалгах юм уу. Юу яриад байгаа юм. Түр хорооны төсвийг баталж өгөхгүй бол “та нар ичихгүй бол би ичихгүй”. Би ард түмнээс хяналт шалгалтыг зохион байгуулахад хандив гуйна.

Хандивын дансаа УИХ-д байлгана. Хувьдаа мөнгө авахгүй. Ард түмний мөнгийг шамшигдуулсан хүмүүсийг шалгах гэж байна. Тиймээс Засгийн газар, сайд нараас хараат бус байх ёстой. Гэтэл давхар дээл өмссөндөө эрдээд УИХ, Монголын ард түмний хяналтаас гарсан аяглал үзүүлж байна. Нүүрсний мафи ярьж байна. Бүгдийг нь улсын нууц гэж хав дарчхаад, УИХ-ын гишүүд, ард түмэн мэдэхгүй байна. Х.Нямбаатар сайд Төрийн болон албаны нууцын тухай хуулийг яаралтай оруулж ирэх хэрэгтэй. Шалгах гэхээр төсвийг нь батлахгүй байна. Хяналтын сонсголыг хийнэ. Сайд нарыг ард түмний өмнө бүгдийг нь гэрчээр байцаана” гэлээ.