Уг чуулган “Тогтвортой хөгжил эмэгтэйчүүдийн оролцоо”сэдвийн дор явагдах юм. Чуулганд оролцогчид нийгэм, эдийн засаг, байгаль орчны сэдвээр илтгэл тавьж хэлэлцүүлэх ажээ. Энэ талаар “Эрдэнэт” сувиллын цогцолборын эмч, доктор Ж.Жавзмаагаас тодруулахад, “Монголын эмэгтэй эрдэмтэд, инженерүүд, технологичид, математикчдын нэгдсэн байгууллага нь 2012 онд анх үүсэн байгуулагдсан түүхтэй

2014 онд Эрдэнэтэд салбараа нээсэн. Энэ байгууллага олон салбарын оюунлаг эмэгтэй, шинжлэх ухааны эрдэмтдийг хамруулсан байгууллага юм. Одоо залуу эмэгтэй эрдэмтдээр хүрээгээ тэлж байна. Мөн залуу эмэгтэй эрдэмтдийн бүтээлээ туурвих, судалгааны ажилд туслах зорилт тавин ажилладаг. Ази номхон далайн орнуудад залуу судлаач, эрдэмтдийн илтгэлийг хэлэлцүүлэх, гадаадад сурч боловсроход нь дэмжлэг үзүүлэх зорилгоор хийгдсэн ажлууд бий. Тус байгууллагад нэртэй эрдэмтэн доктороос гадна залуу судлаачид багтан ажилладгаараа онцлог. Дэлхийн улс орны төрийн тэргүүнүүд НҮБ-ын бага хурал дээр тогтвортой хөгжлийг хэрэгжүүлэх саналыг анх дэвшүүлэн тавьсан. Иймээс энэ удаагийн чуулган “Тогтвортой хөгжил эмэгтэйчүүдийн оролцоо” сэдэвтэй. Чуулганд оролцогчид шинжлэх ухаан технологийн салбарт удирдах эмэгтэйчүүдийн оролцоог нэмэгдүүлэх, залууст ажил мэргэжлийн зөвлөгөө өгөх, шагнал, урамшууллын талаар авч хэлэлцэн санал бодлоо солилцож шийдвэр гаргана. Ирэх жил Ази номхон далайн орны эмэгтэй эрдэмтэд, инженер, технологич, математикчдын олон улсын чуулган Монгол улсад болно. 2023 оны том чуулганы өмнө Эрдэнэтэд ийм үйл ажиллагаа зохион байгуулах болсон нь нэр төрийн хэрэг. Дэлхийн олон улсын эмэгтэй эрдэмтдийн ерөнхийлөгчийн сонгууль 2021 онд болсон. Энэ сонгуульд ялалт байгуулж ерөнхийлөгчөөр сонгогдсон Солонгосын эрдэмтэн цахимаар мэндчилгээ дэвшүүлнэ. Эрдэнэт үйлдвэрээс нэг төлөөлөгч зочин илтгэл тавина. Аймаг, үйлдвэрийн удирдлагуудын мэндчилгээг зочид, төлөөлөгчдөд хүргэнэ. УИХ-ын гишүүн Ч.Ундрам, Ази номхон далайн орны эмэгтэй эрдэмтдийн дэд ерөнхийлөгч доктор П.Ариунболор, ШУА-ийн хими, химийн технологийн хүрээлэнгийн залуу судлаач, доктор Ц.Болор, Монгол Германы хамтарсан Ашигт малтмалын их сургуулийн багш, докторант С.Энхжаргал нар “Шийдвэр гаргах түвшинд эмэгтэйчүүдийн оролцоо”, “МЭЭИТМ-ийн одоо ба ирээдүй”, “Хог, ургамлын химийн найрлага, биологийн идэвхийн судалгаа”, “Монгол орны гангийн судалгаа” сэдвээр илтгэл тавьж хэлэлцүүлнэ” гэв.