Баянзүрх дүүрэгт гэр хорооллын дахин төлөвлөлт эрчимтэй өрнөж шинэ орон сууцны барилгууд баригдаж байгаа. Тэгвэл шинээр баригдсан орон сууцуудыг давхардуулж худалдсан, улсын комисс хүлээж аваагүйгээс тог цахилгааны гэрээ хийгдэхгүй, халаалт дулаангүй зэрэг асуудлаас иргэдийн эрх зөрчигдөж байгаа талаар ч мөн иргэдийн төлөөлөл асуудлаа уламжилсан юм. Хэдийгээр хуулийн байгууллагаар энэ асуудлыг шийдвэрлэх шаардлагатай ч хүйтний улирал эхэлж буй энэ үед иргэдийн эрхийг хамгаалах үүднээс дүүргийн Засаг даргын Тамгын газраас ажлын хэсэг байгуулагдан маргаантай орон сууцны барилгуудад ажиллахаар боллоо хэмээн Баянзүрх дүүргээс мэдээллээ.

Дахин төлөвлөлтийн талаар хэлэлцүүлэг өрнүүлж тодорхойгүй асуудлуудыг шийдвэрлэнэ

Баянзүрх дүүрэгт гэр хорооллын дахин төлөвлөлт эрчимтэй өрнөж шинэ орон сууцны барилгууд баригдаж байгаа. Энэ хэрээр шинээр баригдсан орон сууцуудыг давхардуулж худалдсан, улсын комисс хүлээж аваагүйгээс тог цахилгааны гэрээ хийгдэхгүй, халаалт дулаангүй зэргээс үүдэн иргэдийн эрх зөрчигдөж буй асуудал ихээр гарч байна.

Энэ асуудал дээр Баянзүрх дүүргийн Засаг дарга Н.Баярмөнх байр сууриа илэрхийллээ. Тэрбээр “Хэдийгээр нэгэнт шүүхэд шилжсэн, улсын комисс байрыг нь хүлээж авахгүй байгаа зэрэг асуудалд орон нутгаас оролцох эрх зүйн зохицуулалт байхгүй ч дүүргийн иргэдийн эрх зөрчигдөж байгаа учраас ДИТХ, НИТХ-ын Төлөөлөгч нараараа дамжуулан энэхүү асуудлыг шат шатанд нь уламжлан, иргэдийн дуу хоолой болон ажиллах болно” гэв.

Мөн тэрбээр санаачлан гэр хорооллын дахин төлөвлөлтийн асуудлаар талуудыг оролцуулсан хэлэлцүүлгийг зохион байгуулахаар харьяа яамд, агентлагт хүсэлтээ өгсөн байгаагаа ч хэлсэн юм.