Монгол Улсын Засгийн газраас өнгөрсөн 9-р сард Хүний эрхийг хангах Үндэсний хороог байгуулсан. Тус хорооны анхдугаар хуралдааныг өнөөдөр зохион байгуулж байна. Хүний эрхийг хангах Үндэсний хороо нь Засгийн газар, түүний харьяа байгууллагуудад хүний эрхийг хангах, хамгаалах талаас ажиллах юм. Гүйцэтгэх засаглалын хүрээнд хүний эрхийг ханган ажиллахад идэвх, санаачилгатай ажиллах шаардлагатай гэж үзэж байгаа учраас Засгийн газрын Хэрэг эрхлэх газраас хүний эрхийн талаарх үйл ажиллагааны төлөвлөгөөг 3 жилээр боловсруулан ажиллахаар болсон.

 

Хүний эрхийг хангах Үндэсний хорооны Анхдугаар хуралдаанаар хүний үндсэн эрхийн хүрээнд салбар бүрийн өнөөгийн нөхцөл байдлын талаар хэлэлцэж байна. Тухайлан хүүхдийн сурч боловсрох эрх, хүний эрхэд суурилсан төсөвлөлт, цахим шилжилтийн хүрээн дэх хүний эрх, бизнес ба хүний эрх, соёлын эрх, бүх нийтийн эрүүл мэнд зэрэг нийгмийн салбар бүрээр нь хөндөн хэлэлцэж байгаагаар онцлог юм. Улмаар хүний хувийн мэдээллийг төрийн байгууллага цуглуулж, ашиглахдаа заавал зөвшөөрөл авдаг болсон, ердийн сургуульд сурч буй хүүхдүүдийн 93-95 хувь нь сурч боловсрох эрхээр хангагдаж байгаа, ирэх оны төсөв хэмнэлтийн тухай хууль дагуу боловсруулагдсан, бизнесийн орчин дахь хүний эрхийг хангах үндэсний үйл ажиллагааны төлөвлөгөөг боловсруулж буй, эрт илрүүлгийн үзлэг оношилгоог эхлүүлсэн гээд сайшаалтай тал байгаа хэдий ч орхигдсон асуудлууд байгаа талаар зөвлөлдөж байна.

 

Үүнд хөгжлийн бэрхшээлтэй хүүхдийн сурч боловсрох эрх, цалин хөлсөөрөө амьдрах эрх, хувь хүний нууцад хамаарах дуу, дүрсний бичлэгийн зохицуулалт зэрэг цаашид заавал шийдвэрлэх ёстой асуудлууд хүлээгдэж байна. Хүний эрхийг хангах Үндэсний хорооны гишүүд өнөөгийн нөхцөл байдлын талаар ийнхүү хэлэлцсэнээр хүний эрхийг хүндэтгэн ажиллах, гүйцэтгэх эрх мэдлийн хэрэгжилтийг бодитоор хангах, хууль эрх зүйн орчныг боловсронгуй болгоход санаачилга гаргах болно. Хуралдаанаар хүний эрхийг хангах цахим хөгжил, бизнес, төсөв, боловсрол, соёл, нийгэм, эрүүл мэнд зэрэг салбаруудын асуудлыг хөндөж, шийдлүүдийг танилцууллаа. ЦХХХ-ны сайд Н.Учрал хуралдаанд оролцож Цахим орчны өнөөгийн байдал, Цахим орчинд хүний эрхийг хамгаалах талаар авч хэрэгжүүлэх арга хэмжээний талаар илтгэл тавилаа.