Онгоцонд зорчиж явсан хүмүүсийн эд зүйлсийг хулгайлсан БНХАУ-ын иргэнд холбогдох хэрэгт Тээврийн прокурорын газраас яллах дүгнэлт үйлдэн, шүүхээр шийдвэрлүүлсэн байна.  Тодруулбал БНХАУ-ын иргэн Ш.Ж Улаанбаатар-Хонконг чиглэлийн агаарын хөлгөөр зорчиж явсан Монгол Улсын иргэдийн гар тээшнээс бугуйн цаг, бэлэн мөнгө зэрэг эд зүйлсийг хулгайлж 45 сая орчим төгрөгийн хохирол учруулжээ. 

Түүний хэргийг Төв аймаг дахь сум дундын эрүүгийн хэргийн анхан шатны шүүх 2023 оны арванхоёрдугаар сарын 22-ны өдөр хянан хэлэлцээд гэм буруутайд тооцож, Эрүүгийн хуулийн 17.1 дүгээр зүйлийн 1 /Хулгайлах/-т зааснаар хорих ял оногдуулахгүйгээр нэг жил найман сарын хугацаагаар тэнссэн байна. Иймээс иргэд агаарын хөлгөөр зорчихдоо эд хөрөнгөө алдахаас сэрэмжилж, анхаарал болгоомжтой байхыг Улсын Ерөнхий Прокурорын Газраас анхаарууллаа.