Хятадын талд төлөх 12 тэрбум юань буюу 5,2 их наяд төгрөгийн хувьд зөвхөн хүүнд нь Монголын тал Хятадын талд нийт 4.4 тэрбум юань буюу 660 сая ам.долларыг төлсөн бол 2021 онд 594 сая юань буюу 87 сая ам.долларын хүү төлөхөөр хүлээгдэж байна. Энэхүү своп хэлцлийн гэрээнд МУ-ын эрх ашиг, үндэсний аюулгүй байдалд хохиролтой хоёр заалт оруулсан байсан нь Монголбанкны Ерөнхийлөгчид хариуцлага тооцох нэг үндэслэл болсон бөгөөд уг хоёр заалтыг гэрээнээс хасах арга хэмжээг авахуулсан юм. Свопын улмаас 2012-2016 онд үүссэн өртэй холбогдуулж бид хариуцлага тооцож ажиллаж байгаа, 2016 оноос хойш нэмж нэг ч юань авахыг зөвшөөрөөгүй. Харин 12 тэрбум юань буюу 5,2 их наяд төгрөгийн өр хүүтэйгээ хамт улсын эдийн засаг, аж ахуй эрхлэгчид, ард иргэдийн нуруун дээр өрийн дарамт үзүүлж байгаа учраас УИХ, Бүх Хятадын Ардын Төлөөлөгчдийн Их Хурлын Байнгын уулзалтын механизмын Гуравдугаар уулзалтын үеэр КОВИД-19 халдвараас үүссэн хүндрэл бэрхшээлийг харгалзан үзэж энэ өрийг тэглэх, хөнгөлөх чиглэлээр хоёр улсын парламентыг хамтарч ажиллах саналыг тавьсан болно.