Уулзалтаар 2022-2023 оны хичээлийн шинэ жилтэй эхлэхтэй холбоотойгоор сургуулийн удирдлагуудад хэрэгжүүлэх шаардлагатай зарим үүрэг даалгаврыг өглөө.

Юуны өмнө сургуулийн захирлууд өвөлжилтийн бэлтгэл ажил, багш ажилчдыг эрүүл мэндийн урьдчилан сэргийлэх үзлэгт хамруулах ажлын явц, хөрөнгө оруулалтын ажлууд, багшийн ёс зүйн асуудлаар цаг үеийн мэдээллүүдийг өгсөн юм. Ерөнхий боловсролын сургуулиуд өвөлжилтийн бэлтгэл ажлаа 100 хувь хангахаар ажиллаж байгаа бөгөөд өөрсдийн нөөц боломждоо тулгуурлан урсгал зардлуудаа хийн, ажилчдаа эрүүл мэндийн үзлэгт хамруулан хүүхдүүдээ хүлээн авахад бэлэн болсон байна. Хүйтний улирал ирж байгаатай холбогдуулан дулаалга, гадна фасад, халаалтын асуудлуудыг шийдэхээр ажиллаж байгаагаа дүүргийн удирдлагуудад мэдэгдсэн юм. Засаг дарга Н.Батсүмбэрэл энэ асуудлыг анхааралдаа авч, дүүргийн Засаг даргын нөөц хөрөнгөөс зарим хөрөнгө оруулалтын асуудлыг шийдвэрлэж өгөхөө мэдэгдлээ. Түүнчлэн эрүүл мэндийн урьдчилан сэргийлэх ажилд анхаарч, ариутгал, халдваргүйжүүлэлтийг сайтар хийж, хичээлийн шинэ жилийг эхлүүлэхийг үүрэг болголоо.