Хүнс, хөдөө аж ахуй, хөнгөн үйлдвэрийн яамнаас ЮНИДО, Монгол Улсын Үндэсний итгэмжлэлийн төвтэй хамтран “ISO/IEC 17021:2015-1 Тохирлын үнэлгээ-Менежментийн тогтолцооны аудит болон баталгаажуулалтыг гүйцэтгэх байгууллагад тавих шаардлага – 1-р хэсэг: Шаардлага” сэдвээр олон улсын онол-дадлага хосолсон сургалтыг тохирлын үнэлгээний байгууллагууд, итгэмжлэлийн үнэлгээний ажилтнууд, шинжээчдэд болон их дээд сургуулиуд, мэргэжлийн холбоодын экспертүүдэд 2022 оны 9-р сарын 26-30-ны өдөр зохион байгууллаа.

 
Тус сургалтаар ISO/IEC 17021-1 стандартын талаар ойлголт өгөх, тогтолцооны баталгаажуулалтын байгууллагыг итгэмжлэх үйл явцын талаар нарийвчилсан мэдлэг олгох зорилготой. Сургалт интерактив бөгөөд бие даасан болон багийн ажиллагаа хэлбэрээр явагдлаа. Мөн илтгэл, дасгал, жишээ судалгаа, практик сургалтаас бүрдэж байгаа юм.

Сургалтыг ЮНИДО-ын Итгэмжлэлийн ахлах эксперт, ISO 17025, 15189, 17020, 17021, 17024, 17065, 17043 стандартуудын ахлах шинжээч ноён Мухамед Саад удирдан явуулав. Тэрбээр Олон улсын лаборатори итгэмжлэлийн хамтын ажиллагааны байгууллагын (ILAC) Итгэмжлэлийн хороо, Хяналтын хороо болон Олон улсын итгэмжлэлийн форум (IAF)-ын Техникийн хорооны гишүүн бөгөөд Арабын итгэмжлэлийн хамтын ажиллагааны байгууллагын ISO 17011 стандартын ижил түвшний үнэлгээний мэргэжилтэн юм.