158 дугаар сургуулийн захирал хүүхдүүд өглөө бүр сургуульдаа ирэхдээ 1.8-2.5 км алхдаг гэдгийг хэллээ. Шороон замтай, гэрэлтүүлэг муу, зэлүүд зэрэг хүндрэлтэй асуудал их учраас хүүхдүүд болон эцэг эхчүүд автобустай болгох саналыг тавьдаг байна. Засаг дарга Н.Баярмөнх энэ асуудлыг яаралтай шийдвэрлэж ажиллахыг үүрэг болголоо.

34 дүгээр хороонд тулгамдаж буй гол асуудлын нэг нь үерийн ус. Байгалийн тогтоц, үерийн ус зайлуулах хоолой байхгүй зэрэг асуудлаас үүдэж жил бүр 40-50 өрх үерт автдаг. Энэ асуудлыг шийдвэрлэж ажиллана гэдгийг Засаг дарга Н.Баярмөнх хэллээ.

Баянзүрх дүүргийн 34 дүгээр хороо нь 2359 өрх айл, 8141 иргэнтэй. Тус хороонд жишиг гудамж, сургууль, цэцэрлэгийн цогцолбор байгуулах ажил өнгөрсөн онуудад хийгдсэн. Харин энэ онд Хөрөнгө оруулалт бүтээн байгуулалтын төвөөс 3х3 сагсан бөмбөгийн талбайг шинээр байгуулж, ашиглалтад оруулсан юм. Цаашид тодорхой шалтгааны улмаас зогсоод байгаа авто замын ажлыг үргэлжлүүлэх, гэрэлтүүлэг шинээр тавих шаардлагатай байна.

 

158 дугаар сургууль, 302 дугаар цэцэрлэгээс хүүхдийн элсэлт болон тулгамдаж буй зарим асуудлаа танилцуулсан. Тухайлбал сургууль хүрэх зам нь явган хүний зорчих хэсэггүй, эвдрэл ихтэй шороон зам байдаг. 2.5 км үргэлжлэх ийм замаар өдөр бүр хүүхдүүд зорчиж хичээлдээ суудаг байна. Энэ байдлыг өөрчилж авто зам бий болгох, яаралтай сургуулийн автобустай болгох саналыг сургууль цэцэрлэгийн удирдлагууд хэллээ.