Даланзадгад-Гурвантэс чиглэлийн хатуу хучилттай автозамын бүтээн байгуулалт нь анх 2011 онд зураг төсөв нь хийгдэж эхэлж байсан бөгөөд аймгийн төсвөөрөө алслагдсан сумдаа автозамаар холбох анхны аймаг болж байсан түүхтэй. 302,7 км тус автозамын ажил 2021,2022 онууд буюу сүүлийн хоёр жилийн хугацаанд эрчимтэй явагдаж уг бүтээн байгуулалт өнөөдөр 156км боллоо.

Энэ онд шинээр 30 км автозамыг орон нутгийн төсвөөр "Эрдэнэ зам" ХХК, "Замын битум" ХХК, "Отгортгуйн бүтээл" ХХК гэсэн 3 аж ахуйн нэгж чанартай, цаг хугацаанд нь хийж гүйцэтгэн өнөөдрийн билэгт сайн өдөр бүтээн байгуулалтын автозамаа албан ёсоор нээж, байнгын ашиглалтад хүлээлгэн өглөө. Эдийн засгийн үр өгөөжтэй, ард иргэдэд ээлтэй энэхүү замын бүтээн байгуулалт нь баруун бүс нутгийн хөгжлийг хурдасгах хамгийн том хөшүүрэг юм.

 

Энэ жилийн автозамын ажлаа амжилттай дуусгасан аж ахуйн нэгжүүдийн замаа нээх үйл ажиллагаанд УИХ-ын гишүүн Д.Бат-Эрдэнэ, аймгийн ИТХ-ын дарга Б.Бадраа, аймгийн Засаг дарга Р.Сэддорж болон аймгийн ИТХ-ын төлөөлөгчид, Гурвантэс, Баяндалай, Ноён, Сэврэй сумдын удирдлагууд, нутгийн иргэд, малчид, гүйцэтгэгч компаниудын ажилчид оролцлоо.

Сүүлийн 2 жилд цар тахалтай, бараа материалын үнэ өссөн олдоц муудсан зэрэг олон хүчин зүйл нөлөөлсөн хүнд цаг үе байсан хэдий ч Даланзадгад-Гурвантэс чиглэлд 50 км замыг барьж ийнхүү ашиглалтад орууллаа.

 

 

Нутгийн хишиг хөтөлбөрийн хүрээнд ирэх жилүүдэд тус замыг Гурвантэс сум хүргэхээр төлөвлөн ажиллаж байна.