Канад Улсын Парламентын Сенатын танхимын дарга Жорж Ж.Фюригийн Монгол Улсад хийсэн албан ёсны айлчлал өндөрлөлөө
Үйл явдал
/
2022-10-14
Монгол Улсын Их Хурлын дарга Гомбожавын Занданшатарын урилгаар Канад Улсын Парламентын Сенатын танхимын дарга Эрхэмсэг ноён Жорж Ж.Фюри, гэргийн хамтаар 2022 оны аравдугаар сарын 09-нөөс 13-ны өдрүүдэд Монгол Улсад албан ёсны айлчлал хийлээ.

 

2022.10.09. Ням гараг

Монгол Улсын Их Хурлын дарга Г.Занданшатарын урилгаар Канад Улсын Парламентын Сенатын танхимын дарга Эрхэмсэг ноён Жорж Ж.Фюри, гэргийн хамтаар Монгол Улсад албан ёсны айлчлал хийхээр Улаанбаатар хотноо хүрэлцэн ирлээ.

(Дэлгэрэнгүйг эндээс үзнэ үү)

700

2022.10.10. Даваа гараг

Улсын Их Хурлын дарга Г.Занданшатар, гэргий Г.Отгонгэрэлийн хамт Канад Улсын Парламентын Сенатын танхимын дарга Эрхэмсэг ноён Жорж Ж.Фюри, гэргий Карен Фюри нарыг Жанжин Д.Сүхбаатарын талбайд угтан мэндчиллээ.

(Дэлгэрэнгүйг эндээс үзнэ үү)

700

Улсын Их Хурлын дарга Г.Занданшатар, гэргий Г.Отгонгэрэл болон эрхэм зочдын хамт Их Эзэн Чингис хааны хөшөөнд хүндэтгэл үзүүлсний дараа Төрийн ордны Ёслол хүндэтгэлийн өргөөний Баганат танхимд саатан, Эрхэмсэг ноён Жорж Ж.Фюри хүндэт зочны дэвтэрт сэтгэгдлээ үлдээн, гарын үсэг зурав.

(Дэлгэрэнгүйг эндээс үзнэ үү)

700


Монгол Улсын Их Хурлын дарга Г.Занданшатар, Канад Улсын Парламентын Сенатын танхимын дарга Эрхэмсэг ноён Жорж Ж.Фюри нар Төрийн ордонд албан ёсны хэлэлцээ хийлээ. Хэлэлцээний үеэр талууд хоёр улсын харилцааг шинэ түвшинд гаргахад “Иж бүрэн түншлэлийн төлөөх Монгол, Канадын хамтын ажиллагааны Замын зураглал”-ын хэрэгжилтийг хангаж, бодит үр дүнд хүргэхэд хоёр улсын хууль тогтоох дээд байгууллагын зүгээс бүх талын дэмжлэг үзүүлэхийн чухлыг харилцан нотоллоо. Талууд 2023 онд тохиох Монгол Улс, Канад Улсын хооронд дипломат харилцаа тогтоосны 50 жилийн ойг хамтран тэмдэглэхэд өндөр ач холбогдол өгч байгаа бөгөөд ойн хүрээнд харилцан айлчлал, уулзалтууд, иргэд хоорондын харилцааг өргөжүүлэхэд чиглэсэн арга хэмжээнүүд зохион байгуулахаар тохиролцов.

(Дэлгэрэнгүйг эндээс үзнэ үү)

700


Монгол Улсын Ерөнхий сайд Лувсаннамсрайн Оюун-Эрдэнэ Монгол Улсад албан ёсны айлчлал хийж буй Канад Улсын Парламентын Сенатын танхимын дарга Эрхэмсэг ноён Жорж Ж.Фюритай Төрийн ордонд уулзлаа. Уулзалтын үеэр талууд "Шинэ сэргэлтийн бодлого"-ын хүрээнд Монгол, Канадын худалдаа, эдийн засаг, хөгжлийн хамтын ажиллагааг өргөжүүлэх, Монгол Улсад Канадын хөрөнгө оруулалтыг нэмэгдүүлэх, хамтарсан төсөл, хөтөлбөр хэрэгжүүлэх нөөц бололцоог бүрэн ашиглах зэрэг асуудлаар ярилцаж, санал солилцлоо.

(Дэлгэрэнгүйг эндээс үзнэ үү)

700

 

Монгол Улсын Ерөнхийлөгч Ухнаагийн Хүрэлсүхэд Канад Улсын Парламентын Сенатын танхимын дарга Эрхэмсэг ноён Жорж Ж.Фюри бараалхав. Ерөнхийлөгч У.Хүрэлсүх ардчилал, хүний эрх, эрх чөлөө, хууль дээдлэх зарчмыг дээдэлсэн нийтлэг үнэт зүйлстэй “гуравдагч хөрш” Канад Улстай “Өргөн хүрээтэй түншлэл”-ийн хүрээнд улс төр, эдийн засаг болон бусад чиглэлээр  харилцаа, хамтын ажиллагааг амжилттай хөгжүүлж байгаад сэтгэл хангалуун байгаагаа илэрхийлэв. Мөн Канад Улсын иргэд Монгол Улсад визгүй зорчдог. Монгол иргэдийг Канад Улсад зорчих визийн асуудлыг хөнгөвчлөх чиглэлээр анхаарч ажиллахыг хүсэв.

Канад Улсын Парламентын Сенатын танхимын дарга Жорж Ж.Фюри хууль тогтоох дээд байгууллагын хамтын ажиллагааг эрчимжүүлж, хоёр талын түншлэл, иргэд хоорондын хэлхээ холбоог гүнзгийрүүлэх зорилгоор айлчилж байгаагаа тэмдэглэв. Тэрбээр хоёр улсын харилцаа, хамтын ажиллагаа  бэхжиж, уул уурхайгаас гадна хөдөө аж ахуй, барилга, эрчим хүч зэрэг олон салбарт хөгжих өргөн боломж байгааг дурдлаа.

(Дэлгэрэнгүйг эндээс үзнэ үү)

700

 

Канад Улсын Парламентын Сенатын танхимын дарга Жорж Ж.Фюрид Улсын Их Хурлын гишүүн, Засгийн газрын гишүүн, Эдийн засаг, хөгжлийн сайд Ч.Хүрэлбаатар бараалхаж, хоёр улсын худалдаа, эдийн засаг, хөрөнгө оруулалтын хамтын ажиллагааг өргөжүүлэх асуудлаар ярилцаж, санал солилцов.

700

2022.10.11. Мягмар гараг

Канад Улсын Парламентын Сенатын танхимын дарга Эрхэмсэг ноён Жорж Ж.Фюри тэргүүтэй төлөөлөгчид Оюутолгойн уурхайн цогцолборт ажиллаж, Канадын хөрөнгө оруулалтаар Өмнөговь аймагт хийгдэж буй төслийн бүтээн байгуулалт, уурхайн үйл ажиллагаатай танилцлаа. Мөн айлчлалынхаа хүрээнд говийн малчин айлд зочилж, монгол ахуй, нүүдэлчин соёлтой танилцав.

 

700

 

2022.10.12. Лхагва гараг

Канад Улсын Парламентын Сенатын тaнхимын дарга Эрхэмсэг ноён Жорж Ж.Фюри тэргүүтэй төлөөлөгчид айлчлалынхаа хүрээнд МҮХАҮТ-д зочилж, Канад Улсын Засгийн газрын санхүүжилтээр, Азийн сангийн “Эмэгтэйчүүдийн эдийн засгийн чадавхыг бэхжүүлэх” төслийн хүрээнд МҮХАҮТ-ын байранд байгуулагдсан “Бизнес эрхлэгч эмэгтэйчүүдийн төв”-тэй танилцлаа.

(Дэлгэрэнгүйг эндээс үзнэ үү)

 

700

 

Канад Улсын Парламентын Сенатын тaнхимын дарга Эрхэмсэг ноён Жорж Ж.Фюри тэргүүтэй төлөөлөгчид “Чингис хаан” хаад, язгууртны музейд зочилж, Хүннүгийн эзэнт гүрний үеэс XX зууны эхэн үе хүртэлх 2000 жилийн хугацаан дахь хаад, язгууртан, нүүдэлчдийн өв соёлтой танилцаж, музейн үзмэрүүдийг үзэж сонирхлоо.

Сэтгэгдэл:
Таны IP: (18.223.172.132)
АНХААРУУЛГА: Уншигчдын бичсэн сэтгэгдэлд https://www.ulsturch.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.