Энэхүү нээлтийн ёслолын ажиллагаанд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх, Засгийн газрын гишүүн, Батлан хамгаалахын сайд Г.Сайханбаяр, ЗХЖШ-ын дарга дэслэгч генерал Д.Ганзориг, Ерөнхийлөгчийн Аюулгүй байдал, Батлан хамгаалах бодлогын зөвлөх бэлтгэл дэслэгч генерал Ц.Тогоо, АНУ-ын Аляскийн Үндэсний гвардын Нэгдсэн штабын дарга бригадын генерал Вэйн Дон, БХЯ, ЗХЖШ, төрийн цэргийн болон хууль сахиулах байгууллагуудын удирдлага, Гадаадын орнуудаас Монгол Улсад суугаа Онц бөгөөд Бүрэн эрхт Элчин сайдууд, цэргийн атташе нар, Монгол талын сургуулийн удирдагч хурандаа Ш.Амарбаясгалан, Америкийн талын сургуулийн удирдагч дэд хурандаа Майкл Тони нарын хүндэт зочид оролцлоо.

Тус сургуульд 15 улсын 1000 орчим цэргийн алба хаагч оролцож, команд штабын сургууль, салааны түвшний хээрийн сургалт, дадлагад хамрагдана. Салааны түвшний сургууль нь эргүүл, цувааны хамгаалалт, хүмүүнлэгийн тусламж, энгийн иргэдийн хамгаалалт зэрэг хичээлийн 10 цэгт явагдаж, сургуульд оролцогсдын энхийг дэмжих ажиллагааны дадлага, чадварыг нэмэгдүүлэх юм. Мөн сургуулийн чөлөөт цагаар Олон улсын Соёлын өдрүүд, сагсан бөмбөг, воллейболын болон буухиа тэмцээн, ЗХЖШ-ын Үлгэр жишээ үлээвэр найрал хөгжим, Цэргийн дуу бүжгийн эрдмийн чуулгын уран бүтээлчдийн тоглолтыг үзүүлэхээр төлөвлөжээ.

Түүнчлэн энэхүү сургуулийн явцад анх удаагаа “Эмэгтэйчүүд энх тайван, аюулгүй байдал” сэдэвт сургалтыг зохион байгуулж буй нь энхийг сахиулах ажиллагаан дахь эмэгтэй цэргийн алба хаагчдын үүрэг, оролцоог нэмэгдүүлэхэд чухал ач холбогдолтой гэдгийг албаныхан онцлов.

Нээлтийн ёслолын эхэнд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүхийг Төрийн хүндэт харуул хүндэтгэн угтсан бөгөөд энэ удаагийн “Хааны эрэлд-2022” энхийг сахиулах ажиллагааны олон улсын хамтарсан сургуулийг нээж ЗХЖШ-ын дарга дэслэгч генерал Д.Ганзориг үг хэллээ.

Үүний дараа Монгол Улсын Ерөнхийлөгч У.Хүрэлсүх хэлэхдээ “Монгол Улс НҮБ-ын гишүүн орны хувьд дэлхийн хамтын нийгэмлэгийн өмнө хүлээсэн үүрэг хариуцлагаа гүнээ ухамсарлаж, энх тайван, амар амгалан амьдралд тэмүүлж байгаа улс орон, ард түмэнд туслаж дэмжихийг эрмэлзэн олон улсын энхийг сахиулах ажиллагаанд царгийн алба хаагчдаа илгээн идэвхтэй оролцсоор байна.

Монгол Улс саяхан Монгол цэрэг энхийг дэмжих ажиллагаанд оролцож эхэлсний 20 жилийн ойг тэмдэглэн өнгөрүүллээ. Бид дэлхий дахины энх тайван, хүн төрөлхтний амар амгалан амьдралын төлөө зүтгэсэн 20 жилийн туршлага, сургамжаа дүгнэн цэгнэж, цаашдын бодлого, зорилтоо тодорхойлж буй цаг үед “Хааны эрэлд-2022” энхийг дэмжих ажиллагааны олон улсын сургууль болж байгаа нь чухал ач холбогдолтой юм. Дэлхий ертөнцийн энхийн төлөө зорилгод нэгдэн манай сайхан оронд морилон саатсан энхийн элч та бүхэн мэдлэг, туршлагаа харамгүй хуваалцаж арвижуулахын зэрэгцээ нүүдэлчин соёл иргэншлийн сонгодог уламжлалыг дээдлэн хадгалж үлдсэн Монгол орны маань түүх цадиг, ахуй соёл, зан заншилтай бага ч болов танилцаж, сайхан дурсамжтай буцна гэдэгт эргэлзэхгүй байна. Эрхэм цэнхэр дуулгатан Та бүхэн энэхүү сургуулийн явцад ойртон нөхөрлөж, улс түмнүүдийн найрамдал, нөхөрлөлийн гүүр, дотнын анд найз болохын ерөөлийг өргөн дэвшүүлье” гэдгийг онцолсон юм.

Монгол Улсын Зэвсэгт хүчин, АНУ-ын Энэтхэг-Номхон далайн командлалтай хамтран “Хааны эрэлд” энхийг сахиулах ажиллагааны хамтарсан сургуулийг 2003 оноос эхлэн хоёр талын сургалт, дадлага хэлбэрээр зохион байгуулж эхэлсэн бөгөөд 2006 оноос олон улсын хамтарсан сургууль болгон өргөжүүлснээр өдгөө 18 дахь удаагаа зохион байгуулж байгаа нь энэ билээ. Сургууль нь 06 дугаар сарын 06-ны өдрөөс 20-ны өдрүүдэд явагдана.

Мөн энэ үеэр АНУ-ын Аляскийн Үндэсний гвардын Нэгдсэн штабын дарга бригадын генерал Вэйн Дон үг хэлж, сургуульд оролцогсдод амжилт хүслээ.