Монгол улсын эдийн засгийн гол тулгуур, тэргүүлэх чиглэл болсон уг салбарыг илүү нэмүү өртөг шингээсэн байдлаар хөгжүүлж, ашигт ажиллагааг сайжруулах зорилгод НЭХН-д нэгдсэн компаниуд хамтран ажиллахаар болж байгаа юм.

НЭХН-ийн Захирал бөгөөд “Эрдэнэс тавантолгой” ХК-ийн Гүйцэтгэх захирал Б.Ганхуяг тэргүүтэй ажлын хэсэг өчигдөр /2022.06.25/ Багануур ХК-нд ажиллалаа. Тэд компанийн үйлдвэрлэлийн үйл ажиллагаа өнөөгийн нөхцөл байдалтай танилцаж мэдээлэл солилцов. “Багануур” ХК-ийн Гүйцэтгэх захирлын үүрэг гүйцэтгэгч Д.Түвшинжаргал дунд хугацаанд хэрэгжүүлэх Стратеги төлөвлөгөө, түүн дотроос хагас коксжсон түлш үйлдвэрлэлийн төслөө онцлон танилцууллаа.

Хурлын үеэр ажлын хэсгээс “НЭХН-ийн 2023-2028 онд хэрэгжүүлэх стратеги төлөвлөгөө”-г боловсруулах зааварчилгааг танилцуулж, эхний ээлжинд хамтран хэрэгжүүлэх ажлуудаа ярилцлаа. Нэн түрүүнд нүүрс боловсруулах, хагас коксжсон түлш үйлдвэрлэлийн чиглэлийн мэргэжлийн боловсон хүчин, хүний нөөцийг бүрдүүлэх, нэгдлийн компаниуд хооронд ажилтан солилцооны хөтөлбөр хэрэгжүүлэх, мөн “ТЭРБУМ МОД” үндэсний хөдөлгөөний хүрээнд байгаль орчин, нөхөн сэргээлтийн чиглэлээр хамтран ажиллахаар санал нэгдлээ.

“Эрдэнэс Монгол” ХХК, түүний бүрэлдэхүүн хэсэг болсон нэгдлүүд нь Үндэсний баялгийн сангийн тухай хуулийг хэрэгжүүлэгч гол концепц байх юм. Өөрөөр хэлбэл, дахин нөхөгдөшгүй байгалийн баялгийн өгөөжийг арвижуулах, томоохон төсөл хөтөлбөр хэрэгжүүлэх санхүүжилтийг бүрдүүлэхийн тулд эдгээр компаниуд бодлого, үйл ажиллагааны хувьд нэгдэж, дэлхийн жишиг бүхий группийн зарчмаар ажиллахаар болж буй юм.