Сүхбаатар дүүргийн Засаг даргын Тамгын газраас өнөөдөр 1-20 дугаар хорооны зорилтот бүлгийн 350 өрхөд хүнсний багцын тусламж үзүүллээ. Монгол Улсын хэмжээнд короновируст цар тахлын шинэ нөхцөл байдалтай холбогдуулан бүх нийтийн хөл хорио тогтоож, аж ахуй нэгж байгууллагуудын үйл ажиллагааг түр хугацаагаар хязгаарласан. Энэ нь өрхийн орлого огцом буурч, зарим иргэд хүнс, тэжээлийн дутагдалд орох эрсдэлийг бий болгож байгаа. Цаг үеийн нөхцөл байдалтай холбогдуулан дүүргийн Засаг дарга 2020 оны 11 дүгээр сарын 19-ний өдөр “Зорилтот бүлгийн иргэдэд хүнсний тусламж үзүүлэх” захирамж гаргаж, хоол, хүнсний дутагдалд орж болзошгүй айлуудад ийнхүү нэг удаагийн дэмжлэг үзүүлсэн юм. Иргэдэд хүнсний тусламжийг хүргэхдээ албан хаагчид халдвар хамгааллын дэглэмийг нарийн баримталж ажиллалаа.