Монгол Улсын ерөнхийлөгч асан Цахиагийн Элбэгдорж өөрийн цахим хуудаснаа үзэл бодлоо илэрхийлж иргэддээ дуу хоолойгоо хүргэсээр байдаг. Гэхдээ асуудал болгон дээр дуу хоолойгоо хүргээд байдаггүй тэрээр энэ удаад  Ерөнхийлөгч Х.Баттулгад хандан уучлал үзүүлэхийг хүслээ.

Нэг үе Монгол улсыг удирдаж явсан төрийн өндөр албан тушаалтанууд, Улсын Их Хурлын гишүүд, эрх мэдэл бүхий эрхэмүүд сонгуулийн  дараагаар ээлж дараалан “Их айл” руу морилох болсон. М.Энхсайханаас эхэлсэн баривчилгаа Н.Номтойбаяр, Ж.Эрдэнэбат, Х.Бат-Ялалт, С.Баярцогт, Б.Бямбасайхан, Да.Ганболд нараар үргэлжилж байна.

Өчигдөр/2020.12.01/-ны өдөр Нийслэлийн Эрүүгийн хэргийн давж заалдах шатны шүүхэд Монгол Улсын Ерөнхий сайд асан С.Баяр, Ч.Давааням нарт холбогдох хэргийн шүүх хурал эхэлсэн ч С.Баяр, С.Баярцогт нарын хэргийг нэгтгэж, Пүрэв гаригт шүүхээр болсон.

Эдгээр эрхэмүүдэд Монгол Улсын Ерөнхийлөгч бүрэн эрхийнхээ хүрээнд уучлал үзүүлэх ёстой хэмээн Монгол Улсын Ерөнхийлөгч асан Ц.Элбэгдорж үзэж буйгаа өөрийн цахим хуудсандаа ийнхүү илэрхийлсэн юм.