Үндэсний соёл амралтын хүрээлэн буюу хүүхдийн паркийн хашааг нээлттэй цэцэрлэг болгох санаачилгын хүрээнд өнөөдөр 14:00 цагаас эхлэн иргэд цуглан, паркийн хашаанд барилга барихыг эсэргүүцэж, үзэл бодлоо илэрхийлж байна.

Иргэд цахим орчинд нэгдэн уг эсэргүүцлийн гарын үсэг зурах үйл ажиллагааг эхлүүлсэн бөгөөд паркийн хойд хаалганы орчимд самбар байрлуулан хүүхдүүдээр зураг зуруулж, хүүхдийн тоглоом цуглуулан уг тоглоомоо “Ид Шидийн Оронд” хандивлана гэв.

Үндэсний соёл амралтын хүрээлэн буюу хүүхдийн паркийн хашаан дахь үлдсэн газарт орон сууц барих гэж байна гэсэн мэдээлэл цахим орчинд тархсан бөгөөд уг мэдээлэл иргэдийг бухимдуулж байна. Одоогоор яг ямар бүтээн байгуулалт хийх нь тодорхойгүй байгаа бөгөөд тодорхойгүй байдал иргэдийг ийн бухимдуулж байгааг иргэн Б.Мөнхсоёл хэлж байв.