Өчигдөр ХХААХҮ-ийн сайд З.Мэндсайхан, Сангийн сайд Б.Жавхлан, Боловсрол, шинжлэх ухааны сайд Л.Энх-Амгалан, Барилга, хот байгуулалтын сайд Б.Мөнхбаатар нар салбар бүрийнхээ ирэх оны төсвийн талаар сэтгүүлчдэд мэдээлэл өгч, сонирхсон асуултад нь хариуллаа.

Сайд З.Мэндсайхан танилцуулгынхаа эхэнд “Ирэх жилийн төсвийн төсөлд Хүнс, хөдөө аж ахуйн сайдын багцад нийтдээ 235.4 тэрбум төгрөг багтсан. Засгийн газраас барьж байгаа үндсэн чиглэл болох малын гаралтай түүхий эдийг боловсруулах үйлдвэрийг дэмжих, хөдөө аж ахуйн салбарыг эдийн засгийн гол тулгуур багана болгох зорилгын хүрээнд төсвөө төсөөлсөн” гэдгийг дурдсан юм.

Салбарын нийт хөрөнгө оруулалтын арга хэмжээнд 71.3 тэрбум төгрөг төсөвлөснөөс 2022 онд шинээр 54.3 тэрбум төгрөг төсөвлөсөн байна.

Дээрх хөрөнгө оруулалтын санхүүжилтээр мал аж ахуй, газар тариалан, хүнсний үйлдвэр, хөнгөн үйлдвэр, жижиг дунд үйлдвэрийн салбарыг хөгжүүлэх гол ажлууд багтаж байна.

Мал аж ахуй

Газар тариалангийн бүс нутагт Дархан, Сэлэнгэ, Төв аймгийн 60 сумын 160 баг багтдаг. Энэ бүс нутагт эрчимжсэн мал аж ахуйг хөгжүүлнэ. Үүний тулд Малын удмын сангийн үндэсний төвийн үйл ажиллагаанд тулгуурлан бэлчээрийн уламжлалт мал аж ахуйг сайжруулах, сүргийн бүтцийг өөрчлөх зорилгоор зохиомол хээлтүүлэг, үржил селекцийн ажлыг зохион байгуулна.

Мал эмнэлэг

Мал аж ахуйн салбарын өрсөлдөх чадварыг дээшлүүлэхэд хамгийн чухал хөшүүрэг бол малын эрүүл мэнд. Тиймээс малын эрүүл мэндийн асуудлыг цогцоор нь шийдвэрлэх зорилт тавьсан. Энэ хүрээнд халдварт өвчнөөс урьдчилан сэргийлэх, лабораторийн оношилгоо, шинжилгээ ариутгал, мал амьтан эрүүлжүүлэх баталгаажуулах сургалт судалгаа зэрэг мал эмнэлгийн арга хэмжээнд 32.2 тэрбум төгрөг төсөвлөсөн.

Газар тариалан

Газар тариалангийн салбарын гол ажил бол үрийн шинэчлэл юм. Өнгөрсөн жил үр тарианы үрийн 30 хувийг элит үрээр бүрдүүлсний үр дүн энэ жилийн ургацаас харагдаж байна. Тиймээс энэ бодлогыг үргэлжлүүлэн хэрэгжүүлнэ.

Мөн энэ жил хүнсний ногооны 65 хувийг дотоодоосоо хангах боломжтой гэсэн тооцоолол гарсан. Ирэх жил энэ тоог 8 хувиар нэмэгдүүлж 73 хувьд хүргэх зорилттой ажиллаж байна. 2020 онд дотоодынхоо 45 хувийг хангаж байлаа.

Жижиг, дунд үйлдвэрлэл

Жижиг, дунд үйлдвэрлэлийг дэмжих, худалдаа бизнесийн орчныг сайжруулахад Жижиг, дунд үйлдвэрийг хөгжүүлэх сангийн зээлийн эргэн төлөлт, Хөдөө аж ахуй, хөдөөгийн хөгжил төслийн эргэн төлөлт, ЖДҮ хөгжүүлэх, байгаль орчныг хамгаалах хоёр үе шаттай зээлийн төслийн эргэн төлөлтөөс зээл олгох юм.