ЭХЭМҮТ-ийн Тандалт судалгааны албаны эх барих эмэгтэйчүүдийн эмч Ц.Отгонцэцэг “Эхийн ноцтой хүндрэл, эндэгдлийн өнөөгийн байдал”, Төрөх тасгийн эрхлэгч Ж.Энхтуяа “Төрсний дараах үеийн цус алдалтын эмчилгээний чиг хандлага, тусламж үйлчилгээ” сэдвээр тус тус мэдээлэл хийлээ. ЭХЭМҮТ-ийн зөвлөх эмч Ж.Энхтуяа эх барихын практикт тохиолддог цус алдалтын хүндрэл нь дэлхийн эхийн эндэгдлийн шалтгааны 15-25%, Монгол Улсын эхийн эндэгдлийн эх барихын шууд шалтгааны 17.8%-ийг эзэлж буйг дурьдаад, цус алдах өндөр эрсдэлтэй эхийн эрсдэл хүндрэлийг эрт үнэлж, төрөлт удирдах, мэс засал хийхийн өмнөх бэлтгэлийг сайтар хангах, цусны бүлгийг тодорхойлох, цусны хувийн ба биологийн тохироо үзэх, тохирсон цус, цусан бүтээгдэхүүнийг захиалан ”ӨРСӨЖ” арга хэмжээ авах, цус алдалтын үеийн эмнэлзүйн илрэл, алдсан цусны хэмжээ, шок, эргэлдэх цусны эзэлхүүний дутагдлын зэрэгт тохируулан, сэлбэлтийг хурдтай хийх, амин чухал үзүүлэлтүүдийг хянах, дулаан байлгах, хөдөлгөөнийг хязгаарлах, цус алдалтын эмнэлзүйн илрэлээс шалтгаалан зарим тохиолдолд умай, өндгөвчийн артерийг боох, мөрөвчлөх оёдол тавих мэс ажилбарыг хийж, умайг үлдээх, бүлэгнэлтийн гажуудалд орсон тохиолдолд биеийн байдал эргэн сэргэх боломж хязгаарлагдмал байдаг зэргээр тусламж үйлчилгээний явцад анхаарах зүйлсийг онцоллоо. ЭХЭМҮТ-ийн зөвлөх эмч М.Энхжаргал эх барихын их хэмжээний цус алдалтын үед үр дүнтэй, төгс тусламж үйлчилгээг багаар, шуурхай үзүүлэх, төрсний дараах хяналтыг сайжруулах, гэрийн эргэлтийн чанарт анхан шатны эмнэлгүүд анхаарах шаардлага буйг сануулав. Хуралд оролцогсдын асуултад зөвлөх эмч Ж.Энхтуяа хариулж, харилцан саналаа солилцсон үр дүнтэй хурал болж өндөрлөсөн ба эмч нарын зүгээс цаашид “Эх барихын үжил халдвар” сэдвээр онолын мэдээлэл авах хүсэлтээ илэрхийллээ. Цахим хуралд идэвхтэй оролцсон эмч, мэргэжилтэн нартаа баярлалаа.