БНМАУ-ын баатар хурандаа генерал Ж.Лхагвасүрэнгийн нэрэмжит Цэргийн гавьяаны одонт Зэвсэгт хүчний 167 дугаар анги, Цэргийн гавьяаны одонт Хилийн цэргийн 0131 дүгээр анги хамтын ажиллагааны хүрээнд уулзалт, сургалт, уралдаан тэмцээнийг зохион байгуулсаар байгаа билээ.

Энэ удаа Зэвсэгт хүчний 167 дугаар ангийн хугацаат цэргийн алба хаагчид Хилийн цэргийн 0131 дүгээр ангид зочилж, хилийн албаны онцлогтой танилцаж, хоёр ангийн дайчид буухиа тэмцээнээр өрсөлдсөн юм.

Цэргийн нийтлэг дүрэм, танин мэдэхүйн асуулттай “АХА” тэмцээнийг Хилийн цэргийн 0131 дүгээр ангийн хамт олон зохион явуулахад тэргүүн байрт тус ангийн байлдагч Б.Мягмардорж, дэд байрт ахлах байлдагч У.Цэрэндэмбэрэл нар шалгарав.

Харин цэрэгжилтийн буухиа тэмцээний тэргүүн байрыг дэслэгч Ч.Амин-Эрдэнэ ахлагчтай Зэвсэгт хүчний 167 дугаар ангийн нэгдүгээр баг, дэд байрыг дэд ахлагч Б.Чулуунбаатар ахлагчтай хилийн цэргийн 0131 дүгээр ангийн хоёрдугаар баг эзэллээ.

Дэслэгч Б.БАТЗАЯА