Өнөөдөр ОЮУТОЛГОЙ ордын далд уурхайн бүтээн байгуулалт ашиглалтад орно. Оюу толгойн ил болон гүний уурхай 2028-2036 оны хооронд жилд дунджаар 500,000 тонн зэс үйлдвэрлэх бөгөөд цаашдын таван жилд дунджаар 350,000 орчим тонн зэс олборлох тооцоо гаргажээ. Мөн Оюу толгой 2021 онд 163,000 тонн зэс үйлдвэрлэсэн аж. Оюу толгойн нийт баялгийн 80 гаруй хувь нь газрын гүнд оршдог. Гүний уурхайн цогцолбор байгуулж, хүдрийг блокчлон олборлох аргаар олборлож газрын гадарга руу тээвэрлэх юм.

2030 он гэхэд Оюу толгой дэлхийд дөрөвт орох зэсийн уурхай болно гэсэн урьдчилсан тооцоог гаргаад буй.  Тус компани үндэсний худалдан авалтад 4.1 тэрбум ам.доллар зарцуулсан бөгөөд Монгол Улсад нийт 13.4 тэрбум ам.доллар зарцуулаад байгаа юм.  Нээлтэд Ерөнхий сайд Л.Оюун-Эрдэнэ, Рио Тинто компанийн удирдлагууд оролцоно.

Ингэснээр Монгол улсын эдийн засгийн үзүүлэлт хоёр дахин нэмэгдэнэ гэж судлаачид тооцоолоод буй.  Далд уурхайн бүтээн байгуулалтын ажил 2016 онд Дубайн гэрээ зурснаар эхлэв.  Түүхэнд үлдэх өдөр зөвхөн 2023-03-13 биш. Оюутолгойн хөрөнгө оруулалтын гэрээ зурсан 2009-10-06 өдөр, Далд уурхайн санхүүжилтийн гэрээ (Дубайн гэрээ) зурагдсан 2015-05-19 өдөр мөн түүхэнд үлдэх өдрүүд. Энэ өдрүүд байгаагүй бол 2023-03-13 нээлт болохгүй байх байсан.