Энэ үеэр Улсын Бүртгэлийн Ерөнхий Газрын дарга Д.Дэлгэрсайхан мэдээллээ:

Энэ оны 3 дугаар сарын 1-нээс үндэсний энгийн цахим гадаад паспортын захиалга эхэлсэн бол өнөөдрөөс үндэсний энгийн цахим гадаад паспорт хэвлэгдэж иргэд хүлээн авахад бэлэн боллоо. Улсын бүртгэлийн байгууллагын энэ онд хэрэгжүүлж буй томоохон ажлуудын нэг Монгол улсын иргэдэд олон улсын стандартад нийцсэн үндэсний энгийн цахим гадаад паспорт олгох байсан. Энэ ажлын хүрээнд манай улс ИКАО буюу олон улсын иргэний нисэхийн байгууллагын нийтийн  түлхүүрийн санд 2021 оны 12-р сард 82 дахь орноор элсэн орсон юм. Уг нийтийн түлхүүрийн санд одоогоор 90 гаруй орон гишүүн болж элссэн байдаг бөгөөд эдгээр орнууд тус мэдээллийн санг дундаа ашигладаг онцлогтой. Цахим гадаад паспорттой иргэдийн мэдээлэл нийтийн түлхүүрийн санд байршдаг. Ингэснээр олон улсын хилийн шалган нэвтрүүлэх, гааль зэрэг газруудад үүсдэг дарааллыг багасгах, бичиг баримтыг хуурамчаар үйлдэх, хугацааг хууль бусаар сунгах асуудлыг зогсоох, иргэний танилтыг дээд түвшний нарийвчлалтай болгох,паспорт олгосон газрыг хөдлөшгүйгээр баталгаажуулах, мэдээллийн аюулгүй байдлын түвшинг нэмэгдүүлэх зэрэг давуу талуудтай.

Иргэд үндэсний энгийн цахим гадаад паспорт болон үндэсний энгийн гадаад паспортын аль нэгийг өөрийн сонголтоор захиалах боломжтой бөгөөд үндэсний энгийн цахим гадаад паспортын үнэ 82500 төгрөг бол үндэсний энгийн паспорт 40000 төгрөгийн үнэтэй.

Дашрамд дурьдахад Австрали, Канад, АНУ, Шенгений орнууд, Япон, Өмнөд Солонгос, Тайвань, Хонконг, Тайланд, Малайз, Сингапур, Индонез, Турк зэрэг улсууд цахим гарц буюу e-gate-ээр цахим паспорт ашиглан нэвтэрч байна.

Сүүлийн гурван жилийн хугацаанд хичээж ажилласны үр дүнд өнөөдөр цахим гадаад паспорттой болж байна. Бичиг баримтыг чанартай найдвартай байх тал дээр зөвлөмжүүд гарсаар байдаг. Цахим паспорт бол бичил чиптэй. Чип нь өөр дээрээ мэдээлэл агуулдаг учраас иргэд хил гаалиар гарахад түргэн шуурхай үйлчлүүлнэ гэсэн үг. Иргэн өөрөө хүсвэл энгийн паспортоо цахим болгох боломжтой.