Говьсүмбэр аймгийн “Барилгын салбарын удирдах ажилтны зөвлөгөөн” 2023 оны 04 дүгээр сарын 13-ны өдөр боллоо. Зөвлөгөөний хүрээнд 2023 онд аймгийн хэмжээнд хийгдэх бүтээн байгуулалтын төслүүдийн талаар танилцуулж, салбарын хэмжээнд хэрэгжиж буй норм норматив, зураг төсөл, барилга угсралтын ажлын явцад анхаарах асуудлыг хэлэлцсэн юм. Мөн барилгын материалын лабораторийн танилцуулга, барилгын материал үйлдвэрлэлийн цахим систем, хүрээлэн буй орчныг хамгаалах чиглэлээр барилгын салбарт хэрхэн хамтран ажиллах зэрэг сэдвүүдээр танилцуулга, мэдээллүүд хийгдсэн нь цаашдын ажлын уялдаа холбоо, анхаарах асуудлуудыг тодорхой хэлэлцсэн ихээхэн ач холбогдолтой боллоо.

Зөвлөгөөнд Барилгын хөгжлийн төв ТӨҮГ-ын ерөнхий инженер Д.Алтанхуягаар ахлуулсан 15 хүний бүрэлдэхүүнтэй баг, хамт олон оролцлоо. Түүнчлэн Говьсүмбэр аймгийн Засаг дарга Г.Батсуурь, аймгийн Засаг даргын Тамгын газар, аймгийн Газрын харилцаа, барилга, хот байгуулалтын газар, Улсын комиссын гишүүд, сумдын Засаг дарга нар, Засаг даргын Тамгын газрын дарга нар, сумдын худалдан авалт хөрөнгө оруулалт хариуцсан мэргэжилтнүүд, аймгийн Барилгачдын холбооны тэргүүн Л.Мөнхцэцэг зэрэг холбогдох албаны 70 гаруй төлөөлөл оролцож барилгын салбарын асуудлуудын талаар хөндөн хэлэлцсэн юм.