Монгол Улсад сүүлийн 20 гаруй жил зонхилон тохиолдож байгаа зүрх судас, хорт хавдар, чихрийн шижин зэрэг халдварт бус өвчин нь нийгмийн эрүүл мэндийн тулгамдсан асуудал болоод байгаа юм.

Шастины нэрэмжит улсын гуравдугаар төв эмнэлэг Нийгмийн эрүүл мэндийн үндэсний төв, МҮОНРТ хамтран “Цусны даралт ихсэлтийн эсрэг аян-2023” үйл ажиллагааг 2023 оны 06 дугаар сарын 22-23-ны өдрүүдэд БОЭТ-д зохион байгуулан, үзлэг оношилгоог хийж байна.

Өвөрхангай аймгийн хувьд зүрх судасны өвчлөл, цус харвалт, элэгний хавдар нь нас баралтын тэргүүлэх шалтгаан болж улсын дунджаас илүү үзүүлэлттэй байгаа. 2022 оны байдлаар нийт нас баралтын 253 буюу 49.5 хувь нь зүрх судас, 145 буюу 28.5 хувь нь хавдрын өвчлөл бүртгэгджээ.

Энэхүү аяны хүрээнд тархины харвалт, зүрхний шигдээс, мэдрэл, бөөр, дотор зэрэг лавлагаа шатлалын мэргэжлийн эмч нарын баг ажиллаж байгаа бөгөөд үзлэг оношилгоонд хамрагдахыг хүссэн хүн бүхэнд нээлттэй байна.

Тус аяны зохион байгуулалтад аймгийн ЗДТГ, ЭМГ, БОЭТ, Арвайхээр сумын өрхийн ЭМТ-үүд дэмжлэг үзүүлж, “Хаан банк сан” нь нийгмийн хариуцлагынхаа хүрээнд санхүүжилтийг бүрэн хариуцан ажиллаж байна.