Хөдөлмөрийн тухай хуулийн шинэчилсэн найруулгын төслийг өнөөдөр УИХ-аар хэлэлцэн баталлаа. Шинэчлэн найруулсан хууль нь 13 бүлэг 166 зүйл заалттай бөгөөд ирэх оны нэгдүгээр сарын 1-ний өдрөөс эхлэн хүчин төгөлдөр мөрдөгдөх юм. 

Хөдөлмөрийн тухай хуулийг шинэчлэн найруулах асуудал 2009 оноос яригдсан боловч УИХ-аар хэлэлцэж чадалгүй олон жилийг үзсэн билээ. Одоогоор хүчин төгөлдөр байгаа Хөдөлмөрийн тухай хууль нь 1999 онд батлагдсан юм. 

Шинэчилсэн найруулгад, зайнаас ажиллах, туслах малчин, ажлын цаг, уурхайчдын жасаа зэрэг хөдөлмөрийн зах зээлд шинээр бий болсон харилцаануудыг нарийн зохицуулж өгснөөрөө онцлог юм. 

Жасаа буюу уурхайчдын олон хоногоор байрлан ажиллах ээлжийн зохицуулалтыг шинээр батлагдсан хуульд анх удаагаа хатуу тогтоон өгч 14 хоног ажиллаж, 14 хоног амрахаар тусгасан юм. 

Одоогоор Монголын уул уурхайн компаниудын жасааг хэрэгжүүлдэг ажиллаж/амрах нийтлэг хугацаа нь 28/14, 20/10, 14/7 хоног байгаа юм. 

Хөдөлмөрийн тухай хууль 2022 оны нэгдүгээр сарын нэгнээс хэрэгжиж эхэлснээр дээрх байдал өөрчлөгдөх төдийгүй хуулийн заалтыг хэрэгжүүлэхийн тулд ихэнх уурхайд ахин нэг ээлж нэмэх шаардлагатай болж 50 мянга гаруй ажлын байр уул уурхайн салбарт шинээр бий болно гэсэн тооцоо бий. 

Эх сурвалж: asiamining.mn