“Бүх Дэлхийн Алтаргана 2024 “ Олон улсын 15-р их наадмыг Булган аймагт зохион байгуулах болсонтой холбоотойгоор Буриад соёл , өв уламжлалыг хөгжүүлэх сангийн тэргүүн С.Билэгсайханаар ахлуулсан баг Аймгийн Засаг дарга Б.Ариун-Эрдэнэтэй тэргүүтэй аймгийн удирдлагуудтай уулзлаа. Дэлхий даяар тархан амьдарч байгаа монголчууд, тэр дундаа буриад зон олныг нэгтгэсэн нэгэн наадам бол “Алтаргана” юм.

1994 онд Хэнтий аймгийн Дадал сумын Дэлүүнболдог Баян-Овоо уулын энгэр дээр анхны “Алтаргана” наадам болж байжээ. Түүний дараагаар Хэнтий аймгийн Батширээт, Дорнод аймгийн Дашбалбар сумдаар дамжин таван удаа нээгдсэн “Алтаргана” наадам 2002 онд ОХУ-ын Агад, 2006 онд Буриадын Улаан-Үд, 2009 онд ОХУ-ын Эрхүүд, 2010 онд Улаанбаатарт, 2012 онд ОХУ-ын Өвөр байгалийн Агын тойрогт, 2014 оны наадам дахин Хэнтийн аймгийн Дэлүүнболдогт болсон бол энэ 2022 онд 14 дэх удаагийн буриад түмний наадам “Алтаргана “ Агийн Буриадын тойрогт өнгөрөгч 7-р сард болсон билээ.

Дэлхийн талыг дагуулж, Хамаг Монголыг нэгтгэдэг Алтаргана гэдэг нь халх дуудлагаар Алтанхаргана цэцгийн нэр гэнэ.