“Барилгын тухай хуулийн хэрэгжилт, тулгамдсан асуудал" сэдэвт хэлэлцүүлэг өнөөдөр /2022.11.29/ “Барилгын хөгжлийн төв” ТӨҮГ-ын БАРИЛГАЧИН танхимд боллоо. Барилга, хот байгуулалтын сайд Б.Мөнхбаатар салбарын төрийн болон төрийн бус байгууллага, аж ахуйн нэгж байгууллагуудын төлөөллүүд, инженерүүд, зураг төсөл зохиогчидтой уулзаж, саналыг нь сонслоо.

Барилгын тухай хуулийн шинэчилсэн найруулга 2016 онд батлагдсанаас хойш 11 удаагийн нэмэлт өөрчлөлт орсон байдаг. Энэ удаад хуульд өөрчлөлт оруулах шалтгааны тухайд, Барилгын салбарт төрөөс баримтлах бодлого, төлөвлөгөө шинээр батлагдсан, мөн салбарын хөгжлийн урт, дунд хугацааны хөгжлийн стратегийн баримт бичиг өргөн баригдсанаас гадна Монгол Улсын хөгжлийн гол чиг хандлагыг тодорхойлсон “Алсын хараа -2050” бодлогын баримт бичигтэй тус хуулийг уялдуулах, мөн төрийн үйлчилгээний цахимжилт, ковид цар тахалтай холбоотойгоор шинэ зохицуулалтуудыг хуульд тусгах нөхцөл үүссэн гэдэг дээр талууд санал бодлоо илэрхийлж, хэлэлцлээ.