Гадны улс орныг зорих монголчууд их байгаа ч, гадаадад сурч боловсроод монголдоо ажиллаж, улс орныхоо бүтээн байгуулалтын салбарт ажиллах эрмэлзэлтэй залуус ч цөөнгүй байна. Улсын их хурлын гишүүн, Барилга хот байгуулалтын сайд Ц.Даваасүрэн эдгээр өдрүүдэд Авсрали улсад ажлын айлчлал хийж байна. Энэ үеэр Авсралид барилга, бүтээн байгуулалтын салбарт ажиллаж, амьдарч байгаа монголчуудын төлөөлөлтэй уулзлаа.

 

Ажил амьдралын орчин нөхцлөө өөрчлөх, үр хүүхдийнхээ ирээдүйг бодож, сурч боловсрохоор гээд олон зорилгоор тэд гадны улсыг зорьж байгаа. Гэхдээ Австрали улсаас шинэ техник технологи нэвтрүүлэх, монголынхоо хөгжил дэвшилд өөрсдийн хүч хөдөлмөрөө зориулж ажиллах сонирхол их байгаагаа уулзалтын үеэр онцолж байлаа.

Тодруулж хэлбэл метро, түргэн галт тэрэгний бүтээн байгуулалтын хяналтын инженер С.Золбаяр тус улсад мэргэжлээрээ 4 жил ажилласан. Цаашдаа Монголд метро баригдах төсөл хэрэгжвэл ажиллах боломжтой гэдгээ илэрхийлсэн.

 

Мөн барилгын мэргэжилтнүүдийг бэлтгэдэг сургалтын “Career go training” компани үйл ажиллагаа явуулж байна. Тэд Монголчууддаа монгол хэл дээр мэргэжил эзэмшүүлж, сертификат олгож, ажилд зуучилдаг байна.

 

Ташрамд дуулгахад, 2023 оны Барилгын шилдэг аж ахуйн нэгжийн нэгээр Австрали улсад үйл ажиллагаа явуулж байгаа “Мон профейшнл” ХХК шалгарсан. Уулзалтын үеэр “Шилдэг аж ахуйн нэгж”-ийн шагналыг компанийн захирал С.Гончигсумлаад гардуулан өгч, баяр хүргэлээ. Мөн олон жил барилгын салбарт тасралтгүй, үр бүтээлтэй ажиллаж байгаа эрхмүүдийг Барилга хот байгуулалтын сайд Ц.Даваасүрэн “Барилга хот байгуулалтын яамны жуух” тэргүүний барилгачин цол тэмдэгээр шагнаж, цаашдын ажил амьдралд нь, их үйлсийг хийж бүтээх гэсэн итгэлд нь урам өгч, Монголдоо ирж хийж бүтээгээрэй хэмээн итгэл өвөрлүүлэн амжилт хүссэн юм.