МАН-ын Удирдах Зөвлөл өнөөдөр хуралдаж, зарим улс төрийн томилгоог хийсэн байна.  Энэ үеэр Нийслэлийн Засаг дарга бөгөөд Улаанбаатар хотын Захирагчаар Х.Нямбаатарыг томилохыг УЗ-ийн гишүүд дэмжжээ.

Хотын даргын томилгооны талаар УИХ-ын гишүүн Х.Нямбаатар дараах байр суурийг илэрхийлж, сэтгүүлчдийн асуултад хариулт өгөв. 

Тэрбээр "Өнөөдөр Монгол Улсын Ерөнхий сайдаас маш олон үүрэг чиглэл, даалгавар авсан.

• Нийслэл хотод 5Ш ажиллагааг эрчимжүүлэх
• Худалдан авалттай холбоотой ажиллагааг ил тод, нээлттэй болгох
• Газар олголт, барилга хот төлөвлөлттэй холбоотой харилцаануудыг бүхэлд нь цахимжуулах гэх мэтчилэн олон үүрэг даалгаврыг тэмдэглэж авсан.

Нийслэл бол маш олон асуудалтай их айл. Улаанбаатарын түгжрэл хамгийн дээд цэгтээ хүрчихсэн байна. Импортын авто машины хязгаарлалт огт хийгдэхгүй байгаа. Нэг амиар олон автобус шинэчлэх гэсэн бодлого сая уначихлаа. Эдгээр худалдан авалттай холбоотой харилцааг эцэслэн дуусгах, нээлттэй сонгон шалгаруулалт зохион байгуулах ажлыг хийнэ. 

Аравдугаар сарын сүүлээс агаарын бохирдол ихэснэ. Энэ асуудлыг бууруулах зэрэг ажлууд байна.

Би өнөөдөр гурван цаг гаруй Ерөнхий сайдаас хоттой холбоотой бодлого, чиглэл авлаа. Миний хувьд ч, Б.Дэлгэрсайхан гишүүний хувьд ч ажилд томилогдъё гэдэг санаачилга гараагүй. Энэ бол цэвэр Засгийн газрын тэргүүний шийдвэр байсан. Иймээс хүндэтгэлтэй хүлээж авсан" гэлээ. 

-Ерөнхий сайд танд санал тавихдаа өөр хувилбар алга гэж хэлсэн үү?

-Надаас өөр хувилбар байхгүй гэж хэлсэн. Мэдээж хотын даргаар томилогдсон тохиолдолд алсдаа хэрэгтэй шийдвэрийг гаргана гэж бодож байна.  Улаанбаатар хотод заримдаа авто машинууд тэг зогсдог асуудал бий.  Өнөөдөр автомашинд импортын ямар нэгэн хязгаарлалт алга. Иймд алсдаа эм мэт тустай, ойрын үедээ давс мэт гашуун зарим шийдвэрийг гаргахаас өөр аргагүй нөхцөл байдалтай байгааг эртхэн хэлэх нь зүйтэй байх.