Улаанбаатар төмөр зам ХНН-ийн Тээвэр зохион байгуулалтын албаны орлогч дарга С.Батдөлийг нэгдүгээр сарын 5-6-нд шилжих шөнө хойшлуулшгүй ажиллагаа явуулж, 48 цагийн хугацаатайгаар баривчилсан байдаг. Ажиллагааны явцад гэр болон хамаарал бүхий объектоос 7.3 тэрбум төгрөг хураан авсан юм.Түүнийг цааш үргэлжүүлэн хорих эсэх шүүх хурал нэгдүгээр сарын 09-нд Баянгол, Хан-Уул дүүргийн эрүүгийн хэргийн танхимд болж, түүнийг нэг сарын хугацаагаар цагдан хорихоор болсон билээ.

С.Батдөлийг:

-2018 оноос эхлэн үл хөдлөх хөрөнгө худалдан борлуулж олсон орлогоос их хэмжээний татварт ногдох орлого буюу 700 орчим сая төгрөгийг Баянгол дүүргийн 25 дугаар хорооны нутаг дэвсгэрт байрлах орон сууцанд болон өөрийн гэртээ нууж татвар төлөхөөс зайлсхийсэн гэмт хэргийг үйлдсэн үйлдэлд,

-Татвар төлөхөөс зайлсхийсэн гэмт хэргийн улмаас олсон орлого болох 7,300,000,000 төгрөгийг мэдсээр байж түүнийг ашигласан, түүний хууль бус эх үүсвэрийг нуун далдлах зорилгоор 2022 онд хөдлөх болон үл хөдлөх эд хөрөнгө худалдан авах зэргээр өөрчилж байнга тогтвортой мөнгө угаасан гэмт хэрэг үйлдсэн гэх үйлдэлд нь яллагдагчаар татсан байдаг.

Улмаар Эрүүгийн хуулийн тусгай ангийн 18.3 дугаар зүйлийн 1 дэх хэсэг /Татвараас зайлсхийх/ мөн хуулийн 18.6 дугаар зүйлийн 2 дахь хэсгийн 2.2 дахь /Мөнгө угаах/ заалтад зааснаар эрүүгийн хэрэг үүсгэн, мөрдөн байцаалтын ажиллагааг явуулж буй юм.