Засгийн газраас 2025 оны төсвөө хэл ам, хэрүүл тэмцэл дундуур арай гэж батлуулав. Төсвийг боож, зангидсан газар нь Сангийн яам. Соёлын сайд Ч.Номингийн хамаарал бүхий “ТЭРЭЛЖ СҮЙХ” зочид буудалд төсвийн хэлэлцүүлэг гэж 50 саяар зохион байгуулсан, улмаар тус зочид буудлыг Улаанбаатар хоттой холбох ажилд 220 тэрбум төгрөгийн тендер зарлаж, ЗУРГААН ЭГНЭЭ ЗАСМАЛ ЗАМТАЙ БОЛГОХООР тохиролцсон зэрэг хэрүүлийн төсөв ихтэй, зарлага өндөртэй төсөв батлуулсан.

Хэргийн эзэн, хэнгэргийн дохиур нь Сангийн сайд Б.Жавхлан, Төрийн нарийн бичгийн дарга Ж.Ганбат нар юм. Гишүүдийн эсэргүүцэл, бухимдлыг үл тоон, хүчээр шахуу төсвөө батлуулсан тус яамныхан одоо өөрсдийн төсвөө үрэн таран хийж, тансаг зэрэглэлийн тавилга авахад ТАТВАР ТӨЛӨГЧДИЙН МӨНГИЙГ ЗАРЛАГАДАЖ байгаа нь анхаарал татахуйц байна.

Учир нь Сангийн яамнаас “АЛБАН ӨРӨӨНИЙ ТАВИЛГА ХЭРЭГСЭЛ” гэсэн нэршилтэй улсын төсвийн 150 сая төгрөг зарлагадах ТЕНДЕР зарлажээ. Tender.gov.mn сайтаар ороод тенлерийн материалыг харах гэсэн боловч ямар нэг тодорхойлох баримт бичиг, шаардлага, харьцуулалт байхгүй. Шууд 150 саяын худалдан авалтын зар оруулсан байх юм.