600 сая төгрөг гэдэг бол манай улс шиг жижигхэн зах зээлтэй, авсаархан эдийн засагтай улсад тийм ч бага мөнгө биш. Гэтэл төрөөс төлжиж, улсаас хөлжсөн нэгэн “сураггүй” компанийн захирал энэ мөнгөөр “гараа угаах” гэж байгаа бололтой. Чамлахаар чанга атга гэж үг бий. Нийслэлийн удирдлагууд 100 шахам тэрбумаар ЯАРМАГТ захиалж бариулсан шинэ өргөө рүүгээ нүүчихсэн тул Д.Сүхбаатарын талбайн хажуу дахь гурван давхар ногоон барилга хоосон шахам бий.

Хий дэмий мөнгө урсгаж, ашиглалтын зардал, ус, дулаан, цахилгаанд зарцуулж байхаар ядаж төлбөрөө төлсөн аж ахуй нэгжүүдийг оруулаад ашиглалтын зардлаа нөхье гэсэн төрийн өмнөөс “дунд хуруугаа гозойлгож” байгаа мэт нэгэнт төвхөнөсөн байраа голж, битүүний өдөр “оффисийн ажилчдын байр” гэсэн утгаар 600 сая төгрөг үрэн таран хийхээр тендер зарлажээ.

УИХ-аас хууль батлаж, Засгийн газраас ТОГТООЛ гаргаж хурган дарга нарын тансаглалыг хориглоод ч тусыг эс олов бололтой. Заавал олон давхар, сүүлийн үеийн, цахилгаан шаттай, тансаг байранд оффислож суухгүй бол “Эрдэнэс” үйлдвэрлэл, технологийн паркийн ажил явахгүй байгаа бололтой.

Түүнчлэн ам нээвэл уушги нээ гэгчээр ер нь үйлдвэрлэл технологийн паркууд АМЖИЛТТАЙ ХӨГЖСӨН ТҮҮХ манай улса байхгүй. Хамгийн зартай нь экс Ерөнхийлөгчийн автортой “Сайншандын аж үйлдвэрийн парк” төсөл. Одоо энэ төслийг бүгд мартсан. ТЭЗҮ, ЗУРАГ ТӨСӨЛ гэх нэрийдлээр их хэмжээний мөнгө үрж, цаас л үйлдвэрлэсэн. Түүний даргаа хотын дарга нарын сэдсэн “Багануурын үйдвэрлэл технологийн парк”, “Эмээлт аж үйлдвэрийн парк”, “Налайх” аж үйлдвэрийн парк, “Багахангай” аж үйлдвэрийн парк гэх мэтээр төсвөөс сул цалинжиж, татвар төлөгчдийн мөнгөөр ялсан намын ажилгүй нөхдүүдийг тэжээдэг “хуурамч төсөл” болсон түүх олон бий.

П.Мөнх-Идэр захирлын удирдаж буй энэ төсөл ч тэдгээрийн араас орж замхарна гэдэгт эргэлзэх зүйлгүй. Мань эр татвар төлөгчдийн мөнгийг 600 саяар нь үрж, тансаг оффист тухлаж байгаад дараагийн сонгуулиар усанд хаясан чулуу шиг алга болохоо мэдэж байгаа байлгүй...