Байгаль орчин, уур амьсгалын өөрчлөлтийн сайд С.Одонтуяа Европын Холбооны Ази-Номхон Далайн бүсийн дэд захирал Паола Пампалони, Европын Холбооноос Монгол Улсад суух Онц бөгөөд Бүрэн эрхт Элчин сайд Ина Марчюлёните, холбогдох төлөөлөгчдийг хүлээн авч уулзлаа. Уулзалтад хоёр талын өндөр түвшний төлөөллүүд оролцож, байгаль орчны салбар дахь хамтын ажиллагааны өнөөгийн байдал, ирээдүйн чиг хандлагын талаар хэлэлцэв

Уулзалтын үеэр Монгол, Европын Холбооны байгаль орчны салбарын олон жилийн хамтын ажиллагааг дүгнэж, хамтран хэрэгжүүлсэн хөтөлбөрүүдийн үр дүнг онцлон тэмдэглэлээ. Тухайлбал, Европын Холбооны санхүүжилтээр хэрэгжиж буй Ойн түншлэлийн хөтөлбөр, “STREAM+” төслүүд хэрэгжсэнээр газрын доройтлыг бууруулах, ойн салбарыг хөгжүүлэхэд томоохон хувь нэмэр болохыг талууд онцлон Европын Холбооны төлөөлөгчдөд талархал илэрхийлэв. Европын Холбооны санхүүжилтээр Европын Холбооны Хими биологи, цацраг идэвхит болон цөмийн эрсдлийг бууруулах Тэргүүн санаачлагын төвөөр дамжуулан Олон улсын шинжлэх ухаан технологийн төвтэй хамтран Төв азийн хэмжээнд био-аюулгүй байдлыг хангах арга хэмжээнд идэвхтэй оролцож буйг дурьлаа. 

Цаашдын хамтын ажиллагааг өргөжүүлэх хүрээнд 2026 онд зохион байгуулагдах “Олон улсын бэлчээр, нүүдлийн мал аж ахуйн жил” болон Цөлжилттэй тэмцэх тухай НҮБ-ын суурь конвенцын Талуудын 17 дугаар бага хурлын бэлтгэл ажлын талаар санал солилцож, Европын Холбоо хамтран ажиллахаа илэрхийлэв. Монгол Улс, Европын Холбоо хоорондын байгаль орчны хамтын ажиллагаа нь тогтвортой хөгжил, бүс нутгийн экосистемийн хамгааллыг хангахад чухал ач холбогдолтойг талууд онцлон тэмдэглэв.