Засгийн газрын нөөц сан гэж дундрашгүй, дуусашгүй их мөнгөтэй нэгэн сан байх. Хоол хүнс, унаа тэрэг, өвс тэжээл, хандив тусламжаас өгсүүлээд нөгөө намын улстөрчийг намнахад хүртэл зарцуулдаг “ИХ МӨНГӨТЭЙ” сан. ЖДҮ санг улстөрчид МАН-ынхан тоносон бол Засгийн газрын нөөц санг САЙДУУД НЬ ТОНОДОГ болжээ.

Тодруулбал Эрүүл мэндийн яамны Төрийн нарийн бичгийн дарга Д.Очирбат 2024 оны 04 сарын 19-нд буюу өдгөөгөөс яг нэг жилийн өмнө тус бүр нь 160 сая төгрөгийн өртөгтэй эмнэлгийн зориулалтаар ашиглах автомашиныг 3 тэрбум 360 сая төгрөгөөр “Таванбогд моторс” ХХК-иас худалдан авах гэрээг байгуулжээ.

Зуднаар нохой зоолно гэдэг. Түүн шиг зуд далимдуулж Монголын тэргүүн баян Ц.Баатарсайханы “Таванбогд моторс” ХХК-л цулайсан бололтой. Орон нутагт автомашин хэрэгтэй юу гэвэл тийм. Гэхдээ бүгд биш. Учир нь УИХ-ын гишүүд, Засгийн газрын сайдууд өөрийн сонгогдсон тойрог, аймгаа сонгуулиас өмнө сайн услаж, автомашинаар “БОРОО ОРУУЛАХ” дөхсөн. Гэвч Эрүүл мэндийн сайд С.Чинзоригийн үед ийнхүү 3,3 тэрбумын гэрээ хийгдсэн нь тус байгууллагын шилэн дансны мэдээллээр ил гараад ирлээ.