Соёл, спорт, аялал жуулчлал, залуучуудын сайд Ч.Номин Бүгд Найрамдах Узбекистан Улсаас Монгол Улсад хавсран суугаа Онц бөгөөд Бүрэн эрхт Элчин сайд Фарход Арзиевыг хүлээн авч уулзаж, соёл, спорт, залуучуудын салбарын харилцаа, хамтын ажиллагааг өргөжүүлэн хөгжүүлэх, хамтарсан соёл, урлагийн арга хэмжээ зохион байгуулах талаар санал солилцов.

Сүүлийн жилүүдэд Монгол, Узбекистаны харилцаа идэвхтэй өргөжин тэлж байгаа бөгөөд соёл, урлагийн салбар дахь хамтын ажиллагааг цаашид улам бэхжүүлэх зорилгоор ойрын хугацаанд соёлын арга хэмжээ, урлагийн тоглолт, үзэсгэлэн, сургалт болон хоёр улсын залуучуудын анхдугаар форумыг зохион байгуулахаар тохиролцов.

Мөн спортын салбарын хамтын ажиллагааг өргөжүүлэн хөгжүүлэх, түүний дотор жүдо, чөлөөт бөхийн төрлөөр туршлага судлах, хамтарсан бэлтгэл хийх зэргээр хамтран ажиллах боломжтойг талууд онцоллоо.