Коронавирусийн улмаас гамшиг эрсдэлийн өндөржүүлсэн бэлэн байдалд ажиллаж байгаа“Эрдэнэт үйлдвэр” ТӨҮГ-ын Гамшгаас хамгаалах штабын Тэргүүлэх мэргэжилтэн Р.Энхболдтой цаг үеийн сэдвээр мэдээлэл солилцлоо.

-Эрдэнэт үйлдвэрийн Гамшгаас хамгаалах штаб өндөржүүлсэн бэлэн байдлын үед хэрхэн ажиллаж байна вэ?

-Эрдэнэт үйлдвэр өнгөрсөн хугацаанд хийж хэрэгжүүлсэн ажлаа аймгийн Эрүүл мэндийн газар, Мэргэжлийн хяналтын газар, өндөржүүлсэн бэлэн байдлын жижүүрүүдэд тогтмол мэдээлж, Уул уурхай, хүнд үйлдвэрийн яаманд 6 цаг тутмын болон 7 хоногийн тайлан мэдээгээ хүргүүлж байна.

Мөн Ерөнхий захирлын А/78 тоот тушаалын хэрэгжилтийн хугацааг сунгасантай холбогдуулан Эрдэнэт сувиллын цогцолборын эмч мэргэжилтнүүд, цехийн эмч нартай хамтран халуун хэмжилт хийх 24 цагийн пост тогтмол ажиллуулж, цэвэрлэгээ, ариутгал, халдваргүйтгэлийн ажлыг зохион байгуулж байна. Ингэхдээ хүн олноор цугладаг ажилчдын автобусыг ариутгаж, Захиргааны I, II байранд ажлын шаардлагаар нэвтэрч байгаа бүх хүний гар ариутгалд хяналт тавьж эхэлсэн.

-Үйлдвэрийн ажиллагсдыг амны хаалтаар хангах ажил ямар шатандаа явна вэ?

-Оёдлын цех боломжоороо нийлүүлэлт хийж, бид өнөөдрөөс үндсэн цехүүддээ хуваарилалт хийж эхэлсэн. Тухайн цехийн хүний нөөцийн албанаас ирүүлсэн тоог үндэслэн амны хаалтыг олгож байна. Өнөөдрийн байдлаар Ил уурхай, Автотээврийн цех, Баяжуулах үйлдвэр, Ус хангамжийн цехэд хуваарилалт хийлээ. Эхний ээлжид ажилтан бүрд нэг ширхэг амны хаалт олгохоор шийдвэрлэн, хоёр өдрийн дотор түгээхээр ажиллаж байна. Ямартаа ч үйлдвэрийнхээ бүх ажилтныг маргаашийн дотор маскаар хангана. Сар шинийн босгон дээр Оёдлын цехээс 4000 амны хаалт нийлүүлсэн. Тэдгээрийг баярын үеэр ажиллаж, жижүүрт гарах цагдаа, үйлчлэгч, ээлжийн жижүүр болон гадаад ажилтнуудад олгосон.

-Орхон аймгийн Засаг даргын захирамжид үйлдвэрийн дэргэдэх “Эрдэнэт” сувиллын цогцолборыг шаардлагатай тохиолдолд бэлэн байлгах тухай тусгасан. Энэ ажлын талаар тодруулбал?

-Орхон аймгийн Онцгой комиссын шийдвэрээр, эрсдэл өндөртэй орноос зорчин ирсэн болон халуурсан иргэдийг аймгийн хэмжээнд тусгаарлах арга хэмжээ авч байна. Мөн өвчний шинж тэмдэг илрээгүй боловч ямар нэг байдлаар гэр бүлийнхэн нь БНСУ-аас ирсэн тохиолдолд мэргэжилтнүүдийн заавар зөвлөгөөний дагуу өөрийн биеийг тандах хугацаа бий. Энэ байдлыг журамлах зорилгоор “Эрдэнэт” сувиллын цогцолборыг бэлтгэх шаардлагатай гэж үзсэн болов уу. Манай зүгээс нөөцөд байсан тусгай зориулалтын өмсгөл, нэмэлт амны хаалтаар “Эрдэнэт” сувиллын цогцолборыг хангасан. Тус цогцолборыг бүрэн хэмжээнд бэлтгэхэд санхүүжилт шаардлагатай тул одоогоор бэлтгэл шатандаа яваа гэж ойлгож болно.

-Тусгаарлагдсан болон тандалтад өртсөн ажилтан бий юу?

-Эрдэнэт үйлдвэрийн хэмжээнд өмнөд Солонгос улсад зорчиж ирсэн болон гэр бүлийнхэн нь ирсэн, явсан зэрэг шалтгаанаар одоогоор 31 ажилтан бүртгэгдсэн. Тэднийг ажлаас бүрэн чөлөөлж, заасан хугацааг хүртэл өөрийн биеийг тандах тухай зөвлөгөөг холбогдох мэргэжлийн байгууллагынхан өгсөн. Энэ дашрамд, үйлдвэрийн ажилтнууд болон Орхон аймгийн иргэд маань болзошгүй эрсдэлээс сэргийлж, эрүүл мэндийн байгууллагын зөвлөмжийн дагуу гарын ариун цэвэр сахих, амны хаалт тогтмол зүүх хэрэгтэйг сануулъя. Халуурсан болон бусад шинж тэмдэг илэрсэн тохиолдолд эмчид үзүүлэх шаардлагатай.

И.Чинтогтох

Фото: Ш.Лхамсүрэн