Хүн намын “Өөрчилнө, цаг нь болсон” сонгуулийн сурталчилгааны нээлт өнөөдөр /2024.06.10/ боллоо.

Нээлтийн үеэр УИХ-ын гишүүн, Хүн намын дарга Т. Доржханд “Монголоо монголоор нь хадгалж, эх орноо хөгжилд гаргах чин сэтгэл, хүсэл тэмүүлэл, эрдэм мэдлэг, итгэл үнэмшил шингэсэн иж бүрэн мөрийн хөтөлбөр бидэнд байна. Мөн үүнийг хэрэгжүүлэх ирээдүй хойч эх орноо гэсэн сэтгэлтэй баг, мэргэжилтнүүд ч бидэнд байна. Хамгийн чухал нь энэ бүхнийг ойлгон таних, шинэ цагаа мэдэр олон түмэн монголчууд, дэмжигчид та бүхэн маань энэхүү өөрчлөлтөд бэлэн байна гэдэгт бид итгэж байна. Бид ирээдүйдээ итгэл алдсан энэ нийгмийг, үргэлж алдагдалтай, өр үйлдвэрлэдэг үрэлгэн төсөв, төр нь томорч бизнес нь жижгэрдэг чөтгөрийн тойрог, хулгайчийг хамгаалдаг хууль шүүхийн тогтолцоог өөрчилнө” хэмээв.

Нээлтийн төгсгөлд Хүн нам УИХ-ын 13 тойрог, жагсаалтад намаа төлөөлөн нэр дэвшиж буй 126 ДАЙЧНЫ танилцуулгыг хүргэлээ.